ব্ৰাজিলে লাভ কৰিলে ভাৰতৰ কোভিড প্ৰতিষেধক

ৰামায়ণৰ যুদ্ধৰ সময়ত আঘাতপ্ৰাপ্ত লক্ষ্মণক সুস্থ কৰি তুলিবলৈ হনুমানে কঢ়িয়াই নিছিল সঞ্জীৱনী সূধা ৷ এই কথাষাৰেই ভাৰতৰ ক্ষেত্ৰত উল্লেখ কৰি ভাৰতক প্ৰশংসা কৰে ব্ৰাজিলৰ ৰাষ্ট্ৰপতি জাইৰ’ বলছোনাৰ’ৱে ৷

নিউজ ডেস্ক, 23 জানুৱাৰী :কোভিড মহামাৰীয়ে জুৰুলা কৰা দেশসমূহৰ ভিতৰত বেছিকৈ ক্ষতিগ্ৰস্ত হৈছিল ব্ৰাজিল ৷ মহামাৰীৰ ফলত মৃত্যু হোৱা লোকক সমাধিস্থ কৰিবলৈ মাটিৰ অভাৱে দেখা দিছিল দেশখনত ৷ কিন্তু শেহতীয়াকৈ দেশখনলৈ ভাৰতে প্ৰদান কৰিছে থলুৱাভাৱে নিৰ্মিত প্ৰতিষেধক কোভিশ্বিল্ড ৷ ইয়াৰ পিচতেই ভাৰতৰ প্ৰধানমন্ত্ৰী নৰেন্দ্ৰ মোডীক টুইটযোগে ধন্যবাদ জ্ঞাপন কৰে দেশখনৰ ৰাষ্ট্ৰপতি জাইৰ’ বলছোনাৰ’ৱে ৷ শনিবাৰে ব্ৰাজিলে লাভ কৰে ভাৰতে প্ৰেৰণ কৰা কোভিশ্বিল্ড প্ৰতিষেধকৰ টীকাসমূহ ৷

মহামাৰীৰ ফলত মৃত্যু হোৱা লোকৰ তালিকাত বিশ্বৰ ভিতৰতে দ্বিতীয় স্থানত থকা দক্ষিণ আমেৰিকাৰ দেশখনে এইদৰে ভাৰতৰ পৰা প্ৰতিষেধক লাভ কৰাক লৈ ভাৰতক ধন্যবাদ জ্ঞাপন কৰে ৷ ব্ৰাজিলৰ ৰাষ্ট্ৰপতিয়ে কৰা টুইটটোত তেওঁ মহাবীৰ হনুমানে সমগ্ৰ পাহাৰখনৰ সৈতে সঞ্জীৱনী সুধা কঢ়িয়াই অনা এখন ছবিও টুইট কৰে ৷ ছবিখনত লেটিন আৰু হিন্দী ভাষাত ধন্যবাদ ভাৰত বুলি লিখা আছিল ৷

দেশৰ বৈদেশিক মন্ত্ৰী এছ জয়শংকৰে প্ৰকাশ কৰা অনুসৰি, ভাৰতে ব্ৰাজিলক প্ৰদান কৰিছে কোভিশ্বিল্ডৰ মিলিয়ন প্ৰতিষেধক টীকা ৷ ভাৰতত নিৰ্মিত এইসমূহ প্ৰতিষেধক ইতিমধ্যেই লাভ কৰিছে বাংলাদেশ, ভূটান, ম্যানমাৰ, মৰক্কো, দক্ষিণ আফ্ৰিকা আৰু ছৌদি আৰবে ৷

কোভিড মহামাৰীৰ ভয়াৱহতাৰ এবছৰৰ পিচতেই ভাৰতেই হৈছে বিশ্বৰ প্ৰথমখন দেশ যিয়ে সম্পূৰ্ণ ঘৰুৱা পদ্ধতিৰে দুটাকৈ প্ৰতিষেধক প্ৰস্তুত কৰি উলিওৱাৰ লগতে বিশ্বৰ সৰ্ববৃহৎ টীকাকৰণ অভিযান আৰম্ভ কৰিছে ৷

লগতে পঢ়ক :কোভিড-১৯ ৰ টীকা সকলোৰে বাবে সাৰ্বজনীন হ'ব লাগেঃ প্ৰধানমন্ত্ৰী