চিটাৰা ডেস্ক, ১৯ ডিচেম্বৰ: বিগ বছ ১৭ ৰ প্ৰতিযোগী মুনাৱাৰ ফাৰুকীৰ প্ৰেমৰ সম্পৰ্কই সম্প্ৰতি বাতৰিৰ শিৰোনাম দখল কৰিছে । শেহতীয়াকৈ আয়েশা খানে শ্ব’টোত ৱাইল্ড কাৰ্ড হিচাপে অংশগ্ৰহণ কৰিছে । আয়েশাই শ্ব’টোত এন্ট্ৰি কৰিয়েই মুনাৱাৰৰ বিৰুদ্ধে ডাবল ডেটিং-চিটিঙৰ অভিযোগ উত্থাপন কৰে । মুনাৱাৰেও এই সন্দৰ্ভত নিজৰ স্থিতি স্পষ্ট কৰিবলৈ চেষ্টা কৰে আৰু লগতে স্বীকাৰ কৰে যে তেওঁ নাজিলা সীতাশীৰ সৈতে সম্পৰ্ক থকাৰ অভিনয় কৰিছিল ।
ইফালে মঙলবাৰে মুনাৱাৰৰ প্ৰাক্তন প্ৰেমিকা নাজিলা সীতাশীয়ে ছ’চিয়েল মিডিয়াত লাইভ আহি মুনাৱাৰৰ বিৰুদ্ধে বহু অভিযোগ উত্থাপন কৰিছে । নাজিলাই কয় যে মুনাৱাৰৰ সৈতে তেওঁৰ এতিয়া কোনো সম্পৰ্ক নাই ।
নাজিলা সীতাশীয়ে লাইভত কয়, ‘‘মই সেই ব্যক্তিজনক সন্মান কৰিছিলো আৰু ৰাজহুৱা মঞ্চত আমাৰ সম্পৰ্কৰ বিষয়ে একো কোৱা নাছিলো । কিন্তু শ্ব’টোত মোৰ বিষয়ে কিছুমান কথা কোৱা হৈছিল যিবোৰ সঁচা নহয় । মই অনুভৱ কৰোঁ যে মোৰ বিষয়ে মই অনলাইনত আহি স্পষ্ট কৰি দিয়াৰ অধিকাৰ আছে । আয়েশা আৰু মুনাৱাৰৰ সম্পৰ্কৰ বিষয়ে মই জনা নাছিলো ।’’
নাজিলাই লগতে কয়, ‘‘মোক সম্পূৰ্ণ বেলেগ কাহিনী কোৱা হৈছিল । মোক বিশ্বাস দিছিল যে মই একমাত্ৰ ছোৱালী যাক তেওঁ ভাল পায় । তেওঁৰ জীৱনত আন কোনো ছোৱালী নাছিল বুলি কৈছিল ৷ কিন্তু এয়া আছিল সম্পূৰ্ণ মিছা কথা । তেওঁ আন বহু ছোৱালীৰ লগতো সম্পৰ্কত আছিল, যাৰ বিষয়ে মই একো ক’ব নোখোজো । মই ভাবো এইবোৰ কথা ব্যক্তিগত আৰু ব্যক্তিগত হৈ থকাটোৱে উচিত । যদিহে কেৱল আয়েশাই ইয়াৰ লগত জড়িত হ’লহেঁতেন তেন্তে মই তাক হয়তো ক্ষমা কৰাৰ কথা ভাবিব পাৰিলোহেঁতেন, কিন্তু আন বহু ছোৱালীও জড়িত হৈ আছে গতিকে মই সেয়া কৰিব নোৱাৰো । মই বিচাৰো মানুহে এইবোৰ কথাত যাতে গুৰুত্ব নিদিয়ে । আজিৰ খণ্ডটো চোৱাৰ পিচত মুনাৱাৰৰ লগত মোৰ কোনো সম্পৰ্ক নাই ।’’
নাজিলাই আৰু কয়, ‘‘এই সকলোবোৰ কথা ৰাজহুৱাকৈ ওলাই অহাটো লজ্জাজনক কথা । মানুহে মোৰ ব্যক্তিগত জীৱনৰ কথা কৈছে । মই তেনেকুৱা হোৱাটো নিবিচাৰো । এই সম্পৰ্কৰ পৰা মই আগবাঢ়িছো আৰু মুনাৱাৰৰ লগত মোৰ আৰু কোনো সম্পৰ্ক নাই । শ্ব’টোত যি দেখুওৱা হৈছে সেয়া গোটেই কাহিনীটো নহয় । এইটো মাত্ৰ তেওঁৰ আৰ্হি যিটো তেওঁ প্ৰতিটো সম্পৰ্কতে অনুসৰণ কৰে । সেই ব্যক্তিজনক মই ক্ষমা কৰিব নিবিচাৰো ।’’
লগতে পঢ়ক:বিতৰ্কত মুনাৱাৰ ফাৰুকী, সমৰ্থনত আগবাঢ়ি আহিল অনুৰাগী
