চিটাৰা ডেস্ক, 23 জুলাই : কেন্দ্ৰীয় মন্ত্ৰী তথা প্ৰাক্তন অভিনেত্ৰী স্মৃতি ইৰাণী পুনৰ চৰ্চালৈ আহিছে (Smriti Irani news) । পিছে এইবাৰ লাইমলাইটলৈ তেওঁৰ কৰ্মৰ বাবে অহা নাই বৰঞ্চ আহিছে তেওঁৰ কন্যা জয়শ ইৰাণীৰ বাবেহে । দৰাচলতে স্মৃতিৰ জীয়েকে গোৱাত চিলি ছ’ল নামৰ এখন কেফে বাৰ এটা চলাই আছে । কেফেখনত অবৈধভাৱে বাৰ চলোৱাৰ অভিযোগত আবকাৰী আয়ুক্তই জাননী পঠিয়াইছে তেওঁলৈ । কেফেখনলৈ কাৰণ দৰ্শোৱাৰ জাননী জাৰি কৰা হৈছে য'ত কোৱা হৈছে যে যিজন ব্যক্তিৰ নামত বাৰখন চলাই থকা হৈছে বিগত বছৰত তেওঁৰ মৃত্যু ঘটিছে ।
এই বিষয়টো তেতিয়া পোহৰলৈ আহিছিল যেতিয়া যোৱা মাহত বাৰৰ অনুজ্ঞাপত্ৰ নবীকৰণ কৰা হৈছিল । লগতে জাননীখনত এইটোও কোৱা হৈছে যে আবেদনখনত অনুজ্ঞাপত্ৰধাৰীৰ নহয়, আন কোনোবা ব্যক্তিৰহে স্বাক্ষৰ পোৱা গৈছে । এনে অৱস্থাত স্মৃতিৰ কন্যাৰ ওপৰত অনুজ্ঞাপত্ৰ আৰু নথি-পত্ৰ সন্দৰ্ভত জালিয়াতিৰ অভিযোগ উত্থাপন হৈছে ।
সংবাদ মাধ্যমৰ খবৰ অনুসৰি, এই সমগ্ৰ বিষয়টোৰ শুনানি ২৯ জুলাইত হ’ব । প্ৰাপ্ত তথ্য মতে অনুজ্ঞাপত্ৰ নবীকৰণৰ আবেদন ২০২২ চনৰ ২২ জুনত এন্থনী ডিগাম নামেৰে কৰা হৈছিল ৷ ৰেকৰ্ড অনুসৰি ২০২১ চনৰ মে’ মাহত এই ব্যক্তিজনৰ মৃত্যু ঘটিছিল ।