চিটাৰা ডেস্ক, ১৯ ছেপ্টেম্বৰ: অতি সোনকালেই পিতৃ হ’ব মিৰ্জাপুৰৰ বাবলু পণ্ডিত নামেৰে পৰিচিত জনপ্ৰিয় অভিনেতা বিক্ৰান্ত মেছি । কিছুদিন পিচতে এটি কণমানি অতিথিৰ আগমণ ঘটিব বিক্ৰান্ত মেছিৰ বাসগৃহত। হয়, শেহতীয়াকৈ বিক্ৰান্তৰ পত্নী শীতল ঠাকুৰ অন্তঃসত্বা হোৱাৰ খবৰ পোৱা গৈছে । প্ৰথম সন্তানক আদৰিবলৈ সাজু হৈছে এই দম্পতীয়ে । বিগত বৰ্ষৰ ফেব্ৰুৱাৰী মাহত পৰম্পৰাগত ৰীতি-নীতি অনুসৰি বিক্ৰান্ত আৰু শীতলৰ বিবাহ হৈছিল । বিবাহৰ এবছৰৰ পিচতে এতিয়া পৰিয়াল পৰিকল্পনা আৰম্ভ কৰাৰ সিদ্ধান্ত লৈছে দুয়ো ।
অভিনেতাগৰাকীৰ এক ঘনিষ্ঠ সূত্ৰই সংবাদ মাধ্যমত জনোৱা মতে, বিক্ৰান্ত আৰু শীতল ঠাকুৰ দুয়োগৰাকীয়ে এই ভাল খবৰত অতি সুখী হোৱাৰ লগতে বিয়াৰ পিচত জীৱনৰ নতুন পৰ্যায়ক লৈও অতিশয় উৎসাহিত । এই খবৰ ওলোৱাৰ পিচতে অনুৰাগীয়ে আগতীয়াকৈ বিক্ৰান্ত আৰু তেওঁৰ পত্নীক অভিনন্দন জনোৱা পৰিলক্ষিত হৈছে ।
ইফালে বিক্ৰান্তৰ ৱৰ্ক ফ্ৰণ্টৰ কথা ক’বলৈ গ’লে বিক্ৰান্ত বৰ্তমান ব্যস্ত অ’টিটিত । ‘মেড ইন হেভেন’, ‘গেছলাইট’ আৰু ‘মুম্বাইকাৰ’ৰ দৰে বহু ৱেব ছিৰিজত তেওঁক দেখা পোৱা গৈছিল । এতিয়া শীঘ্ৰেই তেওঁক দেখা যাব ইয়াৰ জিগ্ৰি, ছেক্টৰ ৩৬, ১২ নং ফেইল আৰু ফিৰ আয়ী হাছিন দিলৰুবাত ।