Tiger Nageswara Rao Trailer: টাইগাৰ নাগেশ্বৰ ৰাওৰ শক্তিশালী ট্ৰেইলাৰ মুকলি, একচন অৱতাৰত ৰবি তেজা

আজি মুক্তি পালে ৰবি তেজাৰ বহু প্ৰত্যাশিত ছবি ‘টাইগাৰ নাগেশ্বৰ ৰাও’ৰ শক্তিশালী ট্ৰেইলাৰ । ট্ৰেইলাৰত দেখা গৈছে ৰবি তেজাৰ একচন অৱতাৰ ।

চিটাৰা ডেস্ক, 3 অক্টোবৰ:দক্ষিণৰ জনপ্ৰিয় অভিনেতা ৰবি তেজাই বহু হিট ছবি উপহাৰ দিছে ৷ ইয়াৰে ভিতৰত আছে, পুৰী জগন্নাধৰ পৰিচালিত ব্যৱসায়িকভাৱে সফল ছবি ‘ইটলু শ্ৰাৱনী সুব্ৰমণিয়াম’ৰ লগতে ‘ইডিয়ট’, ‘ভেংকি’, ‘না অটোগ্ৰাফ’ আৰু ‘ক্ৰেক’ৰ দৰে বহু ছবি । শেহতীয়াকৈ অভিনেতাগৰাকীয়ে চিৰঞ্জীৱীৰ সৈতে আন এখন হিট ছবি আগবঢ়াইছিল । সেয়া হৈছে ‘ৱালটেয়াৰ বীৰ্য্যা’ ৷ এতিয়া অভিনেতাগৰাকীৰ আন এখন ছবি মুক্তিৰ পথত ৷ সেয়া হৈছে ‘টাইগাৰ নাগেশ্বৰ ৰাও’৷

ৰবি তেজাক ‘টাইগাৰ নাগেশ্বৰ ৰাও’ত ষ্টুয়াৰ্টপুৰামৰ সৰ্ববৃহৎ চোৰ হিচাপে দেখা যাব । অনুপম খেৰ, নুপুৰ সেনন, গায়ত্ৰী ভৰদ্বাজ, ৰেণু দেশাই, যীশু সেনগুপ্ত আৰু মুৰলী শৰ্মাইও ছবিখনত গুৰুত্বপূৰ্ণ চৰিত্ৰত অভিনয় কৰিছে। ইফালে আজি মুকলি হ’ল ছবিখন শক্তিশালী ট্ৰেইলাৰ ৷

টাইগাৰ নাগেশ্বৰ ৰাওৰ শক্তিশালী ট্ৰেইলাৰ

টাইগাৰ নাগেশ্বৰ ৰাওৰ ট্ৰেইলাৰ মুকলি কৰিবলৈ মুম্বাইলৈ আহিছে ৰবি তেজা ৷ অৱশেষত মুক্তি পালে ৰবি তেজাৰ বহু প্ৰত্যাশিত ছবিখনৰ ট্ৰেইলাৰ । এইখিনিতে উল্লেখ কৰিব লাগিব যে টাইগাৰ নাগেশ্বৰ ৰাওৰ ট্ৰেইলাৰ দুৰ্বল হৃদয়ৰ বাবে নহয় । কুঠাৰেৰে মূৰ কাটি পেলোৱাৰ পৰা আৰম্ভ কৰি মানুহৰ ওপৰত নিৰ্যাতন কৰালৈকে বামসীৰ পৰিচালনাৰ এই ছবিখন নিশ্চিতভাৱে একচন ভৰ্তি হ’ব । টাইগাৰ নাগেশ্বৰ ৰাওৰ ট্ৰেইলাৰ ৫ টা ভিন্ন ভাষাত মুক্তি লাভ কৰিছে ।

ট্ৰেইলাৰত দেখুওৱা হৈছে ষ্টুয়াৰ্টপুৰাম নামৰ এখন অন্ধকাৰ পৃথিৱী, য’ত ভাল কামৰ কোনো অস্তিত্ব নাই । ট্ৰেইলাৰটোত আচলতে ষ্টুয়াৰ্টপুৰাম নাগেশ্বৰ ৰাওৰ চৰিত্ৰ দেখুওৱা হৈছে, যিজনৰ চলন্ত ৰে’লত চুৰি কৰাৰ নিজা শৈলী আছে । ইয়াৰ পিচতে ৰবি তেজাৰ মাত শুনা যায় ট্ৰেইলাৰটোত আৰু তেওঁ কয়- আৰক্ষীৰ লোকে মন দি শুনিব, কাকিনাদাৰ পৰা মাদ্ৰাজলৈ যোৱা চৰকাৰী এক্সপ্ৰেছত বাটত ডাঙৰ চুৰি হ’ব । ইয়াৰ পিচত এজন আৰক্ষীয়ে কয় আপুনি কোন ? ইয়াৰ পিচত ৰবি তেজাৰ মাত আহে, হত্যা কৰাৰ আগতে বা লুট কৰাৰ আগতে সকীয়নি দিয়াটো মোৰ চখ । ইয়াৰ পিচত অনুপম খেৰৰ প্ৰৱেশ হয়, তেওঁ কয় যে তেওঁ ২৫ বছৰত বহুতো অপৰাধ সাহিত্য লিখিছে । ইফালে নুপুৰ সেনন আৰু ৰবি তেজাৰ ৰোমান্টিক কেমিষ্ট্ৰী ট্ৰেইলাৰটোত দেখুওৱা হৈছে । মুঠতে ছবিখনৰ ট্ৰেইলাৰ শক্তিশালী ।

কেতিয়া মুক্তি পাব টাইগাৰ নাগেশ্বৰ ৰাও ?

এই ছবিখন ৭০ৰ দশকৰ পটভূমিৰ ওপৰত আধাৰিত । বামসীৰ পৰিচালিত ‘টাইগাৰ নাগেশ্বৰ ৰাও’ অভিষেক আগৰৱালা আৰ্টছৰ বেনাৰত প্ৰযোজনা কৰিছে অভিষেক আগৰৱালাই । লগতে প্ৰযোজনা কৰিছে মায়ংক সিংঘানিয়া আৰু অৰ্চনা আগৰৱালাই । ৰবি তেজাৰ অভিনীত এই প্যান-ইণ্ডিয়ান ছবিখন ২০ অক্টোবৰত ছবিগৃহত মুক্তি পাব ।

লগতে পঢ়ক:Lahore 1947: ছানী দেওলৰ সৈতে হাত মিলালে আমিৰ খানে, ‘গদৰ ২’ৰ দৰে বক্স অফিচত হিট হ’বনে এই যুটি ?