চিটাৰা ডেস্ক, 10 অক্টোবৰ: ছলমান খান আৰু কেটৰিণা কাইফৰ বহু প্ৰত্যাশিত ছবি ‘টাইগাৰ ৩’ ৰ শেহতীয়াকৈ ট্ৰেইলাৰ মুকলি হৈছে ৷ ট্ৰেইলাৰ মুক্তিৰ পিচতে অনুৰাগীয়ে ছবিখনৰ বাবে অতি আগ্ৰহেৰে অপেক্ষা কৰি আছে ৷ অনুৰাগীৰ অপেক্ষাৰ মাজতে ছলমানে বৃহস্পতিবাৰে ছবিখনৰ প্ৰথমটি গীতৰ কথা ঘোষণা কৰিছিল ৷ লগতে গীতটিৰ সৈতে ছলমানে ঘোষণা কৰিছিল যে ছলমানৰ ছবিত পোনপ্ৰথমবাৰৰ বাবে অৰিজিতে কণ্ঠদান কৰিব ৷ এই খবৰ লাভ কৰাৰ পিচৰে পৰা অনুৰাগী উচাহ আৰু দুগুণ বৃদ্ধি পাইছিল ৷ কাৰণ পূৰ্বে ছলমান আৰু অৰিজিতৰ মাজত মনোমালিন্য আছিল ৷ যাৰ বাবে অৰিজিতে কেতিয়াও ছলমানৰ ছবিত গীত গোৱাৰ সুযোগ পোৱা নাছিল ৷ কিন্তু ছলমানৰ এই ঘোষণাৰ পিচৰে পৰা স্পষ্ট হৈ পৰিছে যে এতিয়া দুয়োৰে মাজৰ মনোমালিন্য দূৰ হৈছে ৷
ইফালে আজি ‘টাইগাৰ ৩’ৰ প্ৰথমটো গীতৰ টিজাৰ মুক্তি দিয়া হৈছে । গীতটিৰ নাম ‘লেকে প্ৰভু কা নাম’ ৷ গীতটিৰ টিজাৰ যশ ৰাজ ফিল্মছৰ ইউটিউব চেনেলত আপলোড কৰিছে নিৰ্মাতাই । অহা ২৩ অক্টোবৰত মুক্তি পাব ছবিখনৰ সম্পূৰ্ণ গীত ।
শুকুৰবাৰে ছলমান খানে নিজৰ অফিচিয়েল ইনষ্টাগ্ৰামত ‘লেকে প্ৰভু কা নাম’ৰ টিজাৰ শ্বেয়াৰ কৰি কেপচনত লিখিছে, ‘‘টাইগাৰ আৰু জ’য়া, পাৰ্টিৰ বাবে সাজু হওক । লেকে প্ৰভু নাম অহা ২৩ অক্টোবৰত ঢৌ তুলিবলৈ আহি আছে । চমু আভাস চাওক... অহা ১২ নৱেম্বৰত চিনেমাগৃহলৈ আহি আছে 'টাইগাৰ ৩'। হিন্দী, তামিল আৰু তেলুগু ভাষাত মুক্তি পাব ।’’