চিটাৰা ডেস্ক, 26 জানুৱাৰী : 22 বছৰ পূৰ্বে বক্স অফিচৰ অভিলেখ ভংগ কৰা ছবি গডাৰৰ ছিকুৱেল আহি আছে ৷ বলীউডৰ জনপ্ৰিয় অভিনেতা ছানী দেউলৰ ‘গডাৰ’ তেওঁৰ অভিনয় জীৱনৰ এখন অন্যতম ছবি । বৃহস্পতিবাৰে উন্মোচন কৰা হয় ‘গডাৰ 2’ শীৰ্ষক ছিকুৱেলৰ প্ৰথমখন পোষ্টাৰ আৰু ইয়াত ছানীয়ে অভিনয় কৰা তাৰা সিঙৰ চৰিত্ৰক তীব্ৰ ৰূপত উপস্থাপন কৰা হৈছে (Gadar 2) ৷ হাতত হাতুৰীৰে সৈতে ছানী দেউলৰ লুকটো অনুৰাগীয়ে পছন্দ কৰিছে ৷ ছবিখনৰ মুক্তিৰ তাৰিখ 11 আগষ্ট, 2023 হিচাপে নিৰ্ধাৰণ কৰা হৈছে । ছানী দেউল আৰু আমীশা পেটেল অভিনীত ছবিখনে 2001 চনত মুক্তি পোৱাৰ পিছত বলীউডত এক আলোড়নৰ সৃষ্টি কৰিছিল আৰু আমীৰ খান অভিনীত অস্কাৰ মনোনীত ছবি ‘লগান’ৰ বিৰুদ্ধে সংঘৰ্ষত লিপ্ত হৈছিল ।
অভিনেতা ছানী দেউলে কয় যে, "গডাৰ - এক প্ৰেম কথা মোৰ জীৱনৰ এক বিশিষ্ট অংশ হৈ আহিছে, ব্যক্তিগতভাৱে লগতে পেছাদাৰীভাৱেও । গডাৰৰ তাৰা সিং কেৱল নায়ক নহয় বৰঞ্চ সকলো বিপদক প্ৰত্যাহ্বান জনোৱা কাল্ট আইকন হিচাপে জনাজাত হৈ পৰিছে । তাৰা সিঙে তেওঁৰ পৰিয়াল আৰু প্ৰেমৰ বাবে সকলো সীমা অতিক্ৰম কৰিছিল । 22 বছৰৰ পিছত দলটোৰ সৈতে পুনৰ সহযোগিতা কৰাটো আছিল এক সৃষ্টিশীলভাৱে সমৃদ্ধিশালী অভিজ্ঞতা" ৷