চিটাৰা ডেস্ক, 29 ছেপ্টেম্বৰ: তামিল চলচ্চিত্ৰ জগতৰ ছুপাৰষ্টাৰ সূৰ্য্য অভিনয়ৰ উপৰিও তেওঁৰ উদাৰতাৰ বাবে জনপ্ৰিয় । অভিনেতাগৰাকীৰ আছে বিশাল ফেন ফ’ল’ৱাৰ ৷ যাৰ বাবে অভিনেতাগৰাকীৰ প্ৰতিখন ছবি বক্স অফিচত ছুপাৰহিট হয় । যিহেতু এজন অভিনেতা অনুৰাগীৰ বাবেই সফলতাৰ শীৰ্ষত উপনীত হয়, সেয়েহে প্ৰায়ে অনুৰাগীৰ শলাগ লোৱা দেখা যায় সূৰ্য্যই ৷ যিমান পাৰে সিমান অনুৰাগীৰ সৈতে জড়িত হৈ থাকিবলৈ চেষ্টা কৰে অভিনেতাগৰাকীয়ে ৷
অনুৰাগীৰ ঘৰত উপস্থিত হ’ল ছুপাৰষ্টাৰগৰাকী
ছুপাৰষ্টাৰ সূৰ্য্যই পুনৰবাৰ প্ৰমাণ কৰিলে নিজৰ উদাৰতা । আচলতে অভিনেতাজনৰ এজন অনুৰাগীৰ মৃত্যু হৈছে আৰু অভিনেতাজনে এই কথা গম পোৱাৰ লগে লগে অনুৰাগীজনৰ ঘৰত উপস্থিত হয়। সূৰ্য্যই এই খবৰ পোৱাৰ লগে লগে সেই অনুৰাগীজনৰ ঘৰত উপস্থিত হৈ তেওঁক শ্ৰদ্ধাঞ্জলি জনায় । সম্প্ৰতি ছ’চিয়েল মিডিয়াত ভাইৰেল হৈ পৰিছে সূৰ্য্যৰ কেইখনমান ছবি, য’ত তেওঁৰ অনুৰাগীজনৰ পিতৃ-মাতৃক লগ পোৱা দেখা গৈছে । আচলতে সূৰ্য্যৰ এই অনুৰাগীৰ নাম আছিল অৰবিন্দ, যিজনৰ এক পথ দুৰ্ঘটনাত মৃত্যু হৈছিল ৷