কৰ্কট ৰোগেই কাল হ’ল অভিনেতা ৰবীন্দ্ৰ বেৰ্দেৰ বাবে !

Ravindra Berde Passed Away: মাৰাঠী আৰু হিন্দী ছবিত কাম কৰা প্ৰবীণ অভিনেতা ৰবীন্দ্ৰ বেৰ্দেৰ দেহাৱসান । দুৰাৰোগ্য ৰোগত আক্ৰান্ত আছিল ৰবীন্দ্ৰ বেৰ্দে ।

চিটাৰা ডেস্ক, ১৩ ডিচেম্বৰ:বহু বছৰ ধৰি ডিঙিৰ কৰ্কট ৰোগত আক্ৰান্ত হৈ আছিল অভিনেতা লক্ষ্মীকান্ত বেৰ্দেৰ ভাতৃ প্ৰবীণ মাৰাঠী অভিনেতা ৰবীন্দ্ৰ বেৰ্দে ৷ অৱশেষত এই ৰোগৰ সৈতে যুঁজি নিয়তিৰ ওচৰত হাৰ মানিলে ৰবীন্দ্ৰ বেৰ্দে । সংবাদ মাধ্যমৰ বাতৰি অনুসৰি নায়ক: দ্য ৰিয়েল হিৰো আৰু সিংঘম আদি ছবিত অভিনয়ৰ বাবে পৰিচিত ৭৮ বছৰীয়া ৰবীন্দ্ৰই কৰ্কট ৰোগত আক্ৰান্ত হৈ মৃত্যুবৰণ কৰে। ইফালে অভিনেতাগৰাকীৰ মৃত্যুৰ পিচতে মাৰাঠী উদ্যোগৰ বহুজনে ছ’চিয়েল মিডিয়া দুখ প্ৰকাশ কৰিছে ।

জানিব পৰা মতে, বিগত কেইবামাহ ধৰি ৰবীন্দ্ৰ বেৰ্দে চিকিৎসাধীন হৈ আছিল ৷ দৰাচলতে ডিঙিৰ কৰ্কট ৰোগ ধৰা পৰাৰ পিচত তেওঁক মুম্বাইৰ টাটা হাস্পতালত ভৰ্তি কৰোৱা হৈছিল । সংবাদ মাধ্যমৰ প্ৰতিবেদন অনুসৰি দুদিন পূৰ্বে ৰবীন্দ্ৰ বেৰ্দেক চিকিৎসালয়ৰ পৰা মুকলি কৰি দিয়া হৈছিল ৷ যদিও বুধবাৰে পুৱা হঠাৎ হৃদৰোগত আক্ৰান্ত হৈ ইহলীলা সম্বৰণ কৰে ।

ৰবীন্দ্ৰ বেৰ্দে ৩০০ৰো অধিক মাৰাঠী ছবিত কাম কৰিছে

ৰবীন্দ্ৰ বেৰ্দে ১৯৬৫ চনত ভ্ৰাম্যমাণৰ পৰা যাত্ৰা আৰম্ভ কৰিছিল । ইয়াৰ পিচত ৩০০ৰো অধিক মাৰাঠী ছবিত তেওঁ অভিনয় কৰে । নিজৰ কেৰিয়াৰত তেওঁ অশোক ছাৰাফ, বিজয় চাৱন, মহেশ কোথাৰে, বিজু খোটে, সুধীৰ যোশী আৰু ভৰত যাদৱৰ দৰে প্ৰবীণ অভিনেতাৰ সৈতে কাম কৰিছিল ।

উল্লেখ্য যে, ৰবীন্দ্ৰ বেৰ্দে ইয়াৰ পূৰ্বে ১৯৯৫ চনত এখন নাটকৰ সময়ত হৃদৰোগত আক্ৰান্ত হৈছিল, অৱশ্যে সেইসময়ত জীৱন ৰক্ষা পৰিছিল তেওঁৰ ৷ ইয়াৰ পিচত ২০১১ চনত তেওঁৰ কৰ্কট ৰোগ ধৰা পৰে ৷ কিন্তু এই প্ৰত্যাহ্বানসমূহৰ মাজতো তেওঁ কাম কৰি গৈছিল । মৃত্যুৰ সময়ত ৰবীন্দ্ৰ বেৰ্দে পত্নী, দুটি সন্তান, বোৱাৰী আৰু নাতি-নাতিনীয়েকক এৰি থৈ যায় ।

অজয় দেৱগন আৰু অনিল কাপুৰৰ সৈতেও কাম কৰিছে ৰবীন্দ্ৰ বেৰ্দে

ৰবীন্দ্ৰ বেৰ্দেই বহু হিন্দী ছবিতো অভিনয় কৰিছিল । ‘নায়ক: দ্য ৰিয়েল হিৰো’ত অনিল কাপুৰৰ সৈতে অভিনয় কৰিছিল । এই ছবিখন ২০০১ চনত মুক্তি পাইছিল । ইয়াৰ উপৰিও ৰোহিত শ্বেট্টীৰ ‘সিংঘম’ ছবিখনতো অভিনয় কৰিছিল ৷ এই ছবিখনৰ মুখ্য চৰিত্ৰত অভিনয় কৰিছে অজয় ​​দেৱগনে । এই একচন ছবিখনত চন্দ্ৰকান্তৰ চৰিত্ৰত অভিনয় কৰিছিল ৰবীন্দ্ৰ বেৰ্দে ।

লগতে পঢ়ক:জয়ন্ত দাসৰ চিকিৎসাৰ সম্পূৰ্ণ খৰচ বহন কৰিব ৰাজ্য চৰকাৰে