চিটাৰা ডেস্ক, 22 জুলাই : চাৰি বছৰৰ বিৰতিৰ পিছত ৰণবীৰ কাপুৰ ৰূপালী পৰ্দালৈ ঘূৰি আহিছে আৰু আহিয়েই অভিনেতাগৰাকীয়ে দৰ্শকলৈ বুলি মাৰিলে ছিক্সাৰ ! শ্বমছেৰাৰ মুক্তিৰ পিছতেই টুইটাৰত নেটিজেন লাগি গ’ল ৰণবীৰৰ অভিনয়ৰ প্ৰশংসাত । কৰণ মালহোত্ৰাৰ দ্বাৰা পৰিচালিত এইখন এখন পিৰিয়ড এক্সন ড্ৰামা ৷ নেটিজেনৰ মতে, হিন্দী চলচ্চিত্ৰ নিৰ্মাতাসকলৰ ভিতৰত এতিয়ালৈকে মুক্তি হোৱা ই এখন শালীনতাপূৰ্ণ ছবি ।
শ্বমছেৰাৰ কাহিনীটো কাল্পনিক নগৰ কাজাত সংঘটিত হৈছে, য’ত এটা যোদ্ধা জনগোষ্ঠীক কাৰাগাৰত বন্দী কৰি, দাস প্ৰথা মানি চলিবলৈ কৈ শুদ্ধ সিং নামৰ এজন নিৰ্দয় স্বৈৰাচাৰী সেনাপতিয়ে অত্যাচাৰ চলাই তেওঁলোকৰ ওপৰত । এজন দাস নেতা কেনেদৰে নিজৰ জনগোষ্ঠীৰ বাবে কিংবদন্তি নেতা হৈ পৰে তাৰ কাহিনী শ্বমছেৰা । নিজৰ জনগোষ্ঠীৰ স্বাধীনতা আৰু মৰ্যাদা ৰক্ষাৰ বাবে তেওঁ অদম্যভাৱে যুঁজ কৰে ।
ইয়াৰ পূৰ্বে পৰিচালক কৰণ মলহোত্ৰাই প্ৰকাশ কৰিছিল যে আগন্তুক ছবি শ্বমছেৰাৰ সংগীত সাত মাহত প্ৰস্তুত কৰা হৈছিল । কঠোৰ পৰিশ্ৰমৰ ফল পাইছে তেওঁলোকে কাৰণ চিনেমাখন উপভোগ কৰি উঠাৰ পিছত দৰ্শকসকলে ছবিখনৰ মিউজিক কম্পজাৰ মিথুনক প্ৰশংসা কৰিছে ৷
কৰণৰ দ্বাৰা পৰিচালিত এই এক্সনধৰ্মী ছবিখন আদিত্য চোপ্ৰাৰ যশ ৰাজ ফিল্মছে প্ৰযোজনা কৰিছে আৰু হিন্দী, তামিল আৰু তেলুগু ভাষাত মুক্তি দিয়া হৈছে । ছবিকেইখন YRFৰ বাবে যিমান গুৰুত্বপূৰ্ণ সিমানেই ইয়াৰ মূখ্য চৰিত্ৰ ৰণবীৰৰ বাবেও গুৰুত্বপূৰ্ণ ।