চিটাৰা ডেস্ক, 31 আগষ্ট:শ্বাহৰুখ খান আৰু নয়নতৰাৰ যুটি প্ৰথমবাৰৰ বাবে দেখা পোৱা যাব ‘জৱান’ ছবিখনক ৷ পাঠানৰ পিচত মুক্তি পাব কিং খানৰ একচন ড্ৰামাৰে ভৰপূৰ ছবি জৱান । অৱশেষত দৰ্শকৰ মাজলৈ আহিল এটলীয়ে পৰিচালনা কৰা বহু প্ৰত্যাশিত ‘জৱান’ৰ ট্ৰেইলাৰ, যিটো চোৱাৰ পিচত অনুৰাগীৰ মাজত বৃদ্ধি পাইছে শ্বাহৰুখ খানৰ চিনেমাখন চোৱাৰ দুগুণ হেঁপাহ ।
এই ছবিখনত অনুৰাগীয়ে দেখা পাব শ্বাহৰুখ খানৰ সম্পূৰ্ণ একচন ৷ লগতে ছবিখনত দেখা যাব শ্বাহৰুখৰ ব্যতিক্ৰমী ৰূপ ৷ কিন্তু এই প্ৰতিবেদনত আমি আপোনালোকক কম শ্বাহৰুখ খানৰ এটা সিদ্ধান্তৰ বিষয়ে, যিটো সিদ্ধান্তই তামিলনাডুৰ ৩ হাজাৰ পৰিয়ালক সহায় কৰিছিল।
শ্বাহৰুখে ‘জৱান’ৰ শ্বুটিংৰ সময়ত লৈছিল এই সিদ্ধান্ত
শ্বাহৰুখ খানৰ ট্ৰেইলাৰ মুক্তিৰ এদিন পূৰ্বে অৰ্থাৎ বুধবাৰে নিশা চেন্নাইত অনুষ্ঠিত হৈছিল ‘জৱান’ৰ প্ৰি-ৰিলিজ ইভেন্ট ৷ এই অনুষ্ঠানত অংশগ্ৰহণ কৰিছিল শ্বাহৰুখ খান, বিজয় সেতুপথি আৰু এটলী ৷ এই সময়ছোৱাত নিৰ্মাতাসকলে উদযাপন কৰে ছবিখনৰ সংগীতক । ‘জৱান’ৰ উন্মোচনী অনুষ্ঠানত কলা পৰিচালক মুথুৰাজে শ্বাহৰুখ খানে চেন্নাইত শ্বুটিং কৰাৰ সিদ্ধান্তই তামিলনাডুৰ হাজাৰ হাজাৰ পৰিয়ালক কেনেদৰে সহায় কৰিছিল সেই বিষয়ে উল্লেখ কৰে ৷
কলা পৰিচালক মুথুৰাজে কয়, আপুনি মুম্বাইৰ পৰা চেন্নাইলৈ আহি শ্বুটিং কৰাৰ সিদ্ধান্ত লোৱাৰ বাবে আজি চেন্নাই-তামিলনাডুৰ ৩০০০ পৰিয়াল আৰ্থিকভাৱে বিকাশিত হৈছে। ইয়াৰ বাবে আমি আপোনাক আন্তৰিক ধন্যবাদ জনাইছো।