চিটাৰা ডেস্ক, 9 মাৰ্চ: বলীউডৰ বিখ্যাত পৰিচালক তথা কৌতুক অভিনেতা সতীশ কৌশিকৰ আকস্মিক মৃত্যুৰ ফলত চলচ্চিত্ৰ জগতত শোকৰ ছাঁ পৰিছে (Satish Kaushik Death) । ৬৬ বছৰীয়া যশস্বী অভিনেতাগৰাকী মৃত্যুৰ পূৰ্বে সম্পূৰ্ণ সুস্থ আছিল ৷ আনকি ৰঙৰ উৎসৱ ফাকুৱাও খেলিছিল অভিনেতাগৰাকীয়ে ৷ আগদিনা হোলী উদযাপন কৰা বলিষ্ঠ অভিনেতাগৰাকীৰ হঠাৎ পিছদিনা কেনেকৈ মৃত্যু হ’ল ? সতীশ কৌশিক মৃত্যুৰ পূৰ্বে ক’ত আছিল আৰু কি কৰি আছিল ? কেনেকৈ হঠাৎ সংঘটিত হ’ল এনে অনাকাংশিত ঘটনা ?
আগদিনা হোলী উদযাপন কৰা সতীশ কৌশিকৰ হঠাৎ মৃত্যু হয় পিছদিনা ৷ জানিব পৰা মতে হৃদৰোগত আক্ৰান্ত হৈ মৃত্যু হয় বলিষ্ঠ অভিনেতাগৰাকীৰ ৷ বলীউডত হৃদৰোগত আক্ৰান্ত হোৱা এয়া প্ৰথমটো ঘটনা নহয়, ইয়াৰ পূৰ্বেও বহু তাৰকাৰ হাৰ্ট এটেকৰ ফলত মৃত্যু হয় ৷ শেহতীয়াকৈ হৃদৰোগত আক্ৰান্ত হৈ অভিনেতা সতীশ কৌশিকৰো মৃত্যু হয় (Satish Kaushik heart attack) ৷
মৃত্যুৰ সময়ত সতীশ কৌশিক ক’ত আছিল ?
প্ৰাৰম্ভিক খবৰ অনুসৰি, সতীশ কৌশিক হোলী উদযাপন কৰি গুৰুগ্ৰামলৈ গৈছিল আৰু তাতেই হঠাৎ অভিনেতাগৰাকী হৃদৰোগত আক্ৰান্ত হয় বুলি জানিব পৰা গৈছে । অভিনেতাগৰাকী বাহনেৰে গৈ থকা অৱস্থাতে হৃদৰোগত আক্ৰান্ত হয় ৷ এনে পৰিস্থিতিত বাহনখন পোনপটীয়াকৈ ফৰ্টিছ হাস্পতাললৈ লৈ যোৱা হয় যদিও চিকিৎসালয় পোৱাৰ পূৰ্বেই অভিনেতাগৰাকীৰ মৃত্যু হয় বুলি জানিব পৰা গৈছে (Satish Kaushik passes away)।