চিটাৰা ডেস্ক, 16 নৱেম্বৰ: ভোজপুৰী চিনেমা জগতত নিজৰ কণ্ঠৰ যাদু বিয়পোৱা সমৰ সিং আজি প্ৰায় ৭ মাহৰ অন্তত কাৰাগাৰৰ পৰা মুকলি আকাশৰ তললৈ আহে ৷ ভোজপুৰী অভিনেত্ৰী আকাংক্ষা ডুবেৰ আত্মহত্যাৰ গোচৰত আকাংক্ষাৰ মাতৃ মধু ডুবেই দাখিল কৰা প্ৰতিবেদনৰ পিচতে সমৰ সিঙক গ্ৰেপ্তাৰ কৰিছিল আৰক্ষীয়ে । ইয়াৰ পিচত বাৰাণসী আদালতে জামিন আবেদন নাকচ কৰাৰ পিচত সমৰ সিঙৰ অধিবক্তাই এই বিষয়ত এলাহাবাদ উচ্চ ন্যায়ালয়ৰ কাষ চাপিছিল । এতিয়া এই গোচৰত শেহতীয়াকৈ সমৰ সিঙক জামিনত মুকলি কৰি দিয়াৰ নিৰ্দেশ দিছিল আদালতে । ইয়াৰ পিচত আজি প্ৰায় ৭ মাহৰ অন্তত সমৰ সিঙক কাৰাগাৰৰ পৰা মুকলি কৰি দিয়া হয় । ইফালে সমৰ সিঙৰ সমৰ্থকসকলে এই খবৰত উৎফুল্লিত হৈ পৰে আৰু কাৰাগাৰৰ পৰা ওলোৱাৰ লগে লগে তেওঁক ফুলৰ মালাৰে আদৰণি জনায় ৷
আকাংক্ষা ডুবেৰ আত্মহত্যাৰ গোচৰৰ মূল অভিযুক্ত সমৰ সিঙক জামিনত মুকলি অৱশ্যে কাৰাগাৰৰ পৰা বাহিৰলৈ ওলাই অহাৰ পিচত সমৰ সিঙে সংবাদ মাধ্যমৰ পৰা নিজকে আঁতৰাই ৰাখে আৰু পোনপটীয়াকৈ গাড়ীত বহি নিজৰ গাঁও আজমগড়লৈ ৰাওনা হয় ।
আকাংক্ষা আত্মহত্যাৰ ঘটনা
আচলতে আকাংক্ষাৰ মাতৃয়ে ভোজপুৰী গায়ক সমৰ সিঙে আকাংক্ষা ডুবেক আত্মহত্যাৰ বাবে উচটনি দিয়াৰ অভিযোগ উত্থাপন কৰি সাৰনাথ থানাত গোচৰ ৰুজু কৰিছিল । ২৬ মাৰ্চত সন্দেহজনক অৱস্থাত আকাংক্ষা ডুবেৰ মৃতদেহ উদ্ধাৰ হৈছিল ৷ বাৰাণসীৰ সাৰনাথ অঞ্চলৰ এটা গেষ্ট হাউচৰ কোঠাত ওলমি থকা অৱস্থাত উদ্ধাৰ হৈছিল অভিনেত্ৰীগৰাকীৰ মৃতদেহ । ইয়াৰ পিচতে সমৰ সিঙক গ্ৰেপ্তাৰ কৰা হৈছিল । আকাংক্ষা ডুবেৰ মৃত্যুৰ পিচত সমৰ সিঙৰ বিৰুদ্ধে কন্যাক শোষণ কৰি হাৰাশাস্তি কৰাৰ লগতে টকা নিদিয়াৰ গুৰুতৰ অভিযোগ উত্থাপন কৰিছিল আকাংক্ষাৰ মাতৃয়ে ।
ইয়াৰ পিচতে বিষয়টো উচ্চ ন্যায়ালয় পায়গৈ আৰু গোচৰৰ শুনানি চলি থকাৰ সময়তে আদালতে সমৰ সিঙক জামিনত মুকলি কৰি দিয়াৰ নিৰ্দেশ দিয়ে । উল্লেখ্য যে, এই ঘটনাৰ পিচতে পলায়ন কৰিছিল সমৰ সিং ৷ বাৰাণসীৰ সাৰনাথ আৰক্ষীকে ধৰি উত্তৰ প্ৰদেশৰ সকলো অঞ্চলৰ আৰক্ষীয়ে সমৰ সিঙক বিচাৰি হাবাথুৰি খাবলগীয়া হৈছিল । অৱশেষত ৬ এপ্ৰিলত সমৰ সিঙক গাজিয়াবাদৰ পৰা গ্ৰেপ্তাৰ কৰা হয় । সমৰ সিঙক বাৰাণসী জিলা কাৰাগাৰত ৰখা হৈছিল য’ৰ পৰা আজি জামিনত মুকলি কৰি দিয়া হয় ।
লগতে পঢ়ক:Akanksha Dubey: আত্মহত্যাৰ পূৰ্বে এস্কেলেটৰৰ সন্মুখত নৃত্য আকাংক্ষা ডুবেৰ, চিচিটিভিত বন্দী সমগ্ৰ দৃশ্য
