Why Pankaj Tripathi rejecting offers: পংকজ ত্ৰিপাঠীয়ে কিয় বাৰে বাৰে প্ৰত্যাখ্যান কৰিছে দক্ষিণৰ ছবিৰ অফাৰ ?

সমগ্ৰ বিশ্বতে নিজৰ অভিনৱ অভিনয়েৰে চলচ্চিত্ৰপ্ৰেমীৰ হৃদয়ত সুকীয়া স্থান দখল কৰা অভিনেতা পংকজ ত্ৰিপাঠীয়ে শেহতীয়াকৈ মুকলিকৈ কৈছে যে (Pankaj Tripathi news) কিয় তেওঁ দক্ষিণৰ ছবিত অভিনয় কৰিব নিবিচাৰে ?

চিটাৰা ডেস্ক, 23 নৱেম্বৰ : এক দীঘলীয়া সময় ধৰি অভিনয় জগতৰ সৈতে জড়িত হৈ থকা পংকজ ত্ৰিপাঠী আজিৰ দিনত সকলোৰে প্ৰিয় অভিনেতাৰ তালিকাত থকা এজন অন্যতম অভিনেতা ৷ পংকজ ত্ৰিপাঠীৰ নাম শুনিলেই সকলোৱে আগ্ৰহ কৰে ছবি নাইবা চিৰিজ চোৱাৰ ৷ নকৰিবইনো কিয় ! যাৰ অভিনয়ত সততা আৰু সহজ-সৰল ভাৱ প্ৰকাশ হয়, বিষয় এটা দৰ্শকৰ ওচৰলৈ যাব পৰাকৈ অৰ্থৱহ হয় তেনে এজন অভিনেতাৰ অভিনয় উপভোগ কৰিবলৈ পোৱাটো দৰাচলতে সৌভাগ্যৰ বিষয় ৷

পংকজ ত্ৰিপাঠীৰ অভিনয়ে চমক সৃষ্টি কৰাৰ পিছৰে পৰাই তেওঁৰ হাতলৈ আহিছে শাৰী শাৰী চিনেমা আৰু চিৰিজৰ অফাৰ ৷ কেৱল হিন্দী মনোৰঞ্জন ক্ষেত্ৰখনৰ পৰাই নহয়, হলীউড, তামিল, তেলুগু সকলো ক্ষেত্ৰৰ পৰাই তেওঁ লাভ কৰিছে বিভিন্ন অফাৰ ৷ কিন্তু ইমান বিপুল জনপ্ৰিয়তাৰ পিছতো মিৰ্জাপুৰৰ কালীন ভাইয়াখ্যাত পংকজ ত্ৰিপাঠীয়ে প্ৰত্যাখ্যান কৰিছে বহুত লোভনীয় অফাৰ (Pankaj Tripathi latest news) !

বৰ্তমান সময়ত দেখিবলৈ পোৱা গৈছে দক্ষিণৰ চিনেমাৰ পয়োভৰ ৷ কিছু কিছু ক্ষেত্ৰত বলীউডৰ ছবিৰ সৈতে তুলনাও কৰা হৈছে টলীউডক, কাৰণ বহু সংখ্যক দৰ্শকৰ মতে বলীউডতকৈ বহুত আগবাঢ়ি গৈছে টলীউড ৷ অৱশ্যে শেহতীয়াকৈ মুক্তি লাভ কৰা ছবিসমূহৰ কথালৈ মন কৰিলে দেখা যায় যে বলীউডৰ ছবিসমূহৰ তুলনাত টলীউডৰ ছবি সমূহে উন্নত প্ৰদৰ্শন কৰিছে ৷ তেনে ক্ষেত্ৰত টলীউডৰ এই সফলতা পিছতো ত্ৰিপাঠীয়ে দক্ষিণৰ পৰা অহা ছবিৰ অফাৰ ৰিজেক্ট কৰা কথাটোৱে সকলোকে আচৰিত কৰি তুলিছে ৷

পংকজ ত্ৰিপাঠীয়ে কিয় বাৰে বাৰে ৰিজেক্ট কৰিছে টলীউড অফাৰ ? 2003 চনত কানাড়া ছবিৰেই নিজৰ অভিনয় কেৰিয়াৰ আৰম্ভ কৰা পংকজ ত্ৰিপাঠীয়ে পাইছিল নেকি কিবা তিক্ত অভিজ্ঞতা ? আনকি বলীউডলৈ অহাৰ পূৰ্বেও তেওঁ তামিল আৰু তেলুগু ছবিত অভিনয় কৰি আহিছিল ৷ শেহতীয়াকৈ অভিনেতাজনে এই সন্দৰ্ভত নিজৰ মন্তব্য আগবঢ়াইছে ৷ দৰাচলতে ত্ৰিপাঠীয়ে কেৱল দক্ষিণ বুলিয়ে নহয় আন কোনো ভাষাতে চিনেমা কৰিব নিবিচাৰে ৷ গোৱাত হৈ থকা আন্তঃৰাষ্ট্ৰীয় চলচ্চিত্ৰ মহোৎসৱৰ সময়ত হোৱা এক সাক্ষাৎকাৰত তেওঁ এই বিষয়ে মুকলিকৈ প্ৰকাশ কৰে ৷

পংকজ ত্ৰিপাঠীয়ে কয়, ‘ভাষা মোৰ বাবে বাধা নহয়, কিন্ত মই হিন্দী ভাষাক গুৰুত্ব প্ৰদান কৰো ৷ ইয়াৰ কাৰণ এইটোৱেই যে মই হিন্দীৰ সৈতে সহজেই মিলি যাব পাৰো ৷ মই এই ভাষাটো বুজি পাওঁ ৷ এই ভাষাৰ অনুভৱ, সূক্ষ্মতা মই আয়ত্ব কৰিব পাৰো ৷ হলীউড পাহৰি যাওক, মই তেলুগু আৰু মালয়ালম ছবিৰ অফাৰ পাইছো ৷ কিন্তু মোৰ এনে অনুভৱ হয় যে ভাষাটো সাৱলীলকৈ ক’ব নোৱাৰিম বাবে মই সেই ছবি সমূহৰ সৈতে ন্যায় কৰি নোৱাৰিম’ ৷ কিন্তু তেওঁ লগতে এইটোও কয় যে যদি অন্য কোনো ভাষাৰ ছবিত তেওঁ হিন্দী ক’বলগীয়া চৰিত্ৰৰ বাবে অফাৰ লাভ কৰে তেতিয়া নিশ্চয়কৈ তেওঁ সেই অফাৰ গ্ৰহণ কৰিব ৷ পংকজ ত্ৰিপাঠীক আগন্তুক চিনেমা ‘অহ মাই গড 2’ ত দেখিবলৈ পোৱা যাব ৷

লগতে পঢ়ক :Actor Fahad Mustafa latest news:গোবিন্দাৰ ভৰি চুই পাকিস্তানী দৰ্শকৰ ৰোষত পৰিল ফহাদ মুস্তফা