চিটাৰা ডেস্ক, 19 জুন: দক্ষিণৰ চলচ্চিত্ৰ জগতৰ পৰা বলীউডলৈ নিজৰ আধিপত্য বিস্তাৰ কৰা অভিনেত্ৰী ৰশ্মিকা মান্দানা শেহতীয়াকৈ চৰ্চিত হৈ পৰিছে ছ’চিয়েল মিডিয়াত ৷ খবৰ অনুসৰি ৰশ্মিকা মান্দানাৰ মেনেজাৰে ৮০ লাখ টকাৰ প্ৰতাৰণা কৰিছে অভিনেত্ৰীগৰাকীক । সংবাদ মাধ্যমৰ খবৰ অনুসৰি এই ঘটনাৰ বিষয়ে জানিব পাৰি ৰশ্মিকাই ততাতৈয়াকৈ মেনেজাৰজনক চাকৰিৰ পৰা বৰ্খাস্ত কৰে । এইখিনিতে উল্লেখ কৰিব লাগিব যে এইজন মেনেজাৰ কেৰিয়াৰৰ আৰম্ভণিৰে পৰা অভিনেত্ৰীগৰাকীৰ সৈতে জড়িত হৈ আছিল ।
খবৰ অনুসৰি ৰশ্মিকাই মেনেজাৰক বহুদিনৰ পৰা চিনি পায় । এনে অৱস্থাত অভিনেত্ৰীগৰাকীয়ে মেনেজাৰজনক অন্ধভাৱে বিশ্বাস কৰিবলৈ আৰম্ভ কৰে । কিন্তু অভিনেত্ৰীগৰাকীৰ বিশ্বাসযোগ্য মেনেজাৰজনে অৱশেষত তেওঁক বিশ্বাসঘাতকতা কৰে । এই ঘটনাৰ বিষয়ে ৰশ্মিকাই জানিব পাৰি তেওঁক কামৰ পৰা বৰ্খাস্ত কৰে ।
খবৰ অনুসৰি মেনেজাৰে ৰশ্মিকাক ৮০ লাখ টকাৰ প্ৰতাৰণা কৰিছে। যদিও ৰশ্মিকাই এই ঘটনা সন্দৰ্ভত আনুষ্ঠানিকভাৱে কোনো প্ৰতিক্ৰিয়া প্ৰকাশ কৰা নাই । ৰশ্মিকাৰ ফালৰ পৰা এক সূত্ৰই জনাইছে – ৮০ লাখ টকাৰ প্ৰৱঞ্চনা কৰিছে মেনেজাৰজনে । অৱশ্যে এই সন্দৰ্ভত কোনো বিতৰ্ক সৃষ্টি কৰিব বিচৰা নাছিল অভিনেত্ৰীগৰাকীয়ে । গতিকে, অভিনেত্ৰীগৰাকীয়ে নিজৰ মেনেজাৰক চাকৰিৰ পৰা বৰ্খাস্ত কৰি নিজেই এই ঘটনাৰ সৈতে মোকাবিলা কৰিছে ।