চিটাৰা,১৭ নৱেম্বৰ :শেহতীয়াকৈ দক্ষিণৰ জনপ্ৰিয় অভিনেত্ৰী তথা নেশ্যনেল ক্ৰাছ ৰশ্মিকা মন্দান্নাৰ ডিপফেক ভিডিঅ' ভাইৰেল হৈছিল । যাক লৈ সমগ্ৰ দেশতে তীব্ৰ প্ৰতিক্ৰিয়াৰ সৃষ্টি হৈছিল । সাংস্কৃতিক, ৰাজনৈতিক সকলো ক্ষেত্ৰতে এই বিষয়টোৱে চৰ্চা লাভ কৰিছিল । ঘটনাটোৰ পাছতে আৰক্ষী আৰু কেন্দ্ৰীয় চৰকাৰে সতৰ্কতামূলক ব্যৱস্থা গ্ৰহণৰ পদক্ষেপ হাতত লৈছে । তাৰ অংশ হিচাপে শেহতীয়াকৈ কেন্দ্ৰীয় চৰকাৰে সামাজিক মাধ্যমৰ বিভিন্ন প্ৰতিষ্ঠানলৈ চমন জাৰি কৰি এনে সমস্যা সমাধানৰ নিৰ্দেশ দিছে ।
সূত্ৰৰ মতে ফেচবুক, ইনষ্টাগ্ৰাম, এক্স আৰু ইউটিউবক এখন সভাত মিলিত হ'বলৈ আহ্বান জনোৱা হৈছে । লগতে তেওঁলোকৰ বিষয়টোৰ ওপৰত নিজৰ নিজৰ দৃষ্টিভংগী প্ৰকাশ কৰিবলৈও কোৱা হৈছে । সামাজিক মাধ্যমৰ এই প্লেটফৰ্মবোৰ এনে বিকৃত সমল প্ৰকাশৰ বাবে দায়বদ্ধ প্ৰাথমিক চেনেল হোৱাৰ বাবে তেওঁলোকৰ সৈতে আলোচনা গুৰুত্বপূৰ্ণ বুলিও স্বীকাৰ কৰিছে চৰকাৰে ।
সূত্ৰটোৱে উল্লেখ কৰা মতে তথ্য আৰু প্ৰযুক্তি মন্ত্ৰালয়ে অন্যান্য প্ৰাসঙ্গিক মন্ত্ৰালয়ৰ সৈতে এই বিষয়টো পুংখানুপুংখভাৱে পৰীক্ষা কৰিব । বিশেষকৈ চলিত ৰাজ্যিক নিৰ্বাচন আৰু অহা বছৰৰ আগন্তুক ৰাষ্ট্ৰীয় নিৰ্বাচনৰ কথা বিবেচনা কৰি এনে ধৰণ ভুৱা প্ৰচাৰক লৈ চৰকাৰ গভীৰভাৱে চিন্তিত হৈছে । মন্দান্নাৰ ভুৱা ভিডিঅ' ভাইৰেলৰ পাছতে চৰকাৰে ডিপফেকৰ সমস্যাটো সমাধান কৰাৰ তাৎক্ষণিক পদক্ষেপ লৈছে ।