Rajinikanth: মুখ্যমন্ত্ৰী যোগীৰ পিচত অখিলেশ যাদৱক সাক্ষাৎ ৰজনীকান্তৰ, মায়াৱতীকো সাক্ষাৎ কৰিব নেকি ৰজনীকান্তে ?

দক্ষিণৰ ছুপাৰষ্টাৰ ৰজনীকান্ত বৰ্তমান উত্তৰ প্ৰদেশত আছে । মুখ্যমন্ত্ৰী যোগী আদিত্যনাথক সাক্ষাৎ কৰাৰ পিচতে আজি তেওঁ সাক্ষাৎ কৰে অখিলেশ যাদৱক ৷

চিটাৰা ডেস্ক, ২০ আগষ্ট: এইকেইদিন ছ’চিয়েল মিডিয়াত ‘জেইলাৰ’ ছবিখনৰ বাবে যথেষ্ট চৰ্চাত আছে দক্ষিণৰ ছুপাৰষ্টাৰ ৰজনীকান্ত ৷ ১০ আগষ্টত ছবিগৃহত মুক্তি লাভ কৰিছে ছবিখন । বৰ্তমান ছুপাৰষ্টাৰগৰাকী উত্তৰ প্ৰদেশত আছে । শনিবাৰে ইউপিৰ মুখ্যমন্ত্রী যোগী আদিত্যনাথক সাক্ষাৎ কৰি তেওঁৰ সৈতে জেইলাৰ ছবিখন চায় ৷

মুখ্যমন্ত্ৰী যোগীক সাক্ষাৎ কৰাৰ এটা ভিডিঅ’ ভাইৰেল হৈছিল য’ত তেওঁ মুখ্যমন্ত্ৰীগৰাকীৰ চৰণ স্পৰ্শ কৰি আশীৰ্বাদ লৈ থকা দেখা গৈছে ৷ অৱশ্যে এই ভিডিঅ’টোক লৈ ছ’চিয়েল মিডিয়াত খুব চৰ্চাও হৈ থকা পৰিলক্ষিত হৈছে । ইফালে যোগীক সাক্ষাৎ কৰাৰ পিচত আজি (২০ আগষ্ট) ৰজনীকান্তে ৰাজ্যখনৰ প্ৰাক্তন মুখ্যমন্ত্ৰী তথা সমাজবাদী পাৰ্টিৰ মুৰব্বী অখিলেশ যাদৱক সাক্ষাৎ কৰে ।

অখিলেশ যাদৱক লগ পোৱাৰ পিচত তেওঁ সংবাদ মাধ্যমৰ আগত কয় যে, অখিলেশ আৰু মই ৯ বছৰ পূৰ্বে লগ হৈছিলো । সেইদিনাৰ পৰা আমি বন্ধু । ফোনতো ইজনে সিজনৰ লগত কথা পাতে । ৰজনীকান্তে কয় যে পাঁচ বছৰ পূৰ্বে যেতিয়া তেওঁ উত্তৰ প্ৰদেশত শ্বুটিঙৰ বাবে আহিছিল তেতিয়া অখিলেশ যাদৱক লগ কৰিব পৰা নাছিল যদিও এতিয়া তেওঁক লগ কৰিবলৈ আহিছে ।

মায়াৱতীৰ লগতো সাক্ষাৎ হ’বনে ৰজনীকান্তৰ ?

এই সময়ত মুখ্যমন্ত্ৰী যোগীৰ সৈতে তেওঁৰ সাক্ষাৎ ভাল বুলি কয় । এতিয়া তেওঁ অযোধ্যালৈ গৈ আছে ৰাম লালাৰ দৰ্শন কৰিব ৰজনীকান্তে । এই সময়ত যেতিয়া তেওঁক সাংবাদিকে সুধিছিল যে, তেওঁ মায়াৱতীকো লগ কৰিব নেকি ? ইয়াৰ উত্তৰত তেওঁ ‘নকৰোঁ’ বুলি কয় ৷

ৰজনীকান্তক লগ পোৱাৰ ফটো শ্বেয়াৰ কৰিছে অখিলেশে

উল্লেখ্য যে, অখিলেশ যাদৱে ৰজনীকান্তৰ সৈতে হোৱা সাক্ষাৎকাৰৰ ছবি তেওঁৰ অফিচিয়েল এক্স হেণ্ডেলত শ্বেয়াৰ কৰিছে । এখন ছবিত দুয়োজনে ইজনে সিজনক সাৱটি ধৰা দেখা গৈছে । দ্বিতীয়খন ফটোত দুয়োকে একেলগে বহি থকা দেখা গৈছে । তেওঁ কয় যে, যেতিয়া তেওঁ মহীশূৰত অভিযান্ত্ৰিক অধ্যয়ন কৰিছিল তেতিয়া সেই সময়ছোৱাত ৰজনীকান্তক পৰ্দাত দেখি তেওঁ অতিশয় আনন্দিত হৈছিল আৰু সুখ এতিয়াও অক্ষত আছে । ৰজনীকান্তে কোৱাৰ দৰেই দুয়োৰে বন্ধুত্ব ৯ বছৰ পুৰণি, অখিলেশ যাদৱেও তেনেকৈয়ে কৈছিল ।

লগতে পঢ়ক:Rajinikanth: যোগীৰ চৰণ চুই আশীৰ্বাদ ল’লে ছুপাৰষ্টাৰ ৰজনীকান্তে, ছ’চিয়েল মিডিয়াত ভাইৰেল ভিডিঅ’