চিটাৰা ডেস্ক, 30মে’:পঞ্জাৱৰ বিখ্যাত গায়ক সিদ্ধু মুছেৱালাক দেওবাৰে মানচাৰ জৱাহৰকে গাঁৱৰ ওচৰত দিন দুপৰতে কোনো অচিনাক্ত ব্যক্তিয়ে গুলীচালনা কৰে ৷ সংকটজনক অৱস্থাত তেওঁক চিকিৎসালয়লৈ লৈ যোৱা হয়, কিন্তু তেতিয়ালৈকে মৃত্যু হয় তাৰকাজনৰ (Sidhu Moosewala death news) ৷
তাৎপৰ্যপূৰ্ণভাৱে, পঞ্জাৱৰ আপ চৰকাৰে শেহতীয়াকৈ বহু লোকৰ নিৰাপত্তা প্ৰত্যাহাৰ কৰিছে । এই ঘটনাটো সংঘটিত হোৱাৰ এদিন আগতে মুছেৱালাৰ নিৰাপত্তাও প্ৰত্যাহাৰ কৰা হৈছিল । মানসা চিকিৎসালয়ৰ অসামৰিক শল্য চিকিৎসক ডাঃ ৰঞ্জিত ৰায়ে জানিবলৈ দিয়া মতে তিনিজন লোকক চিকিৎসালয়লৈ অনা হৈছিল । ইয়াৰ ভিতৰত, সিদ্ধু মুছেৱালাই ইতিমধ্যে মৃত্যুবৰণ কৰিছিল । আন দুজন লোকক তেওঁলোকৰ উন্নত চিকিৎসাৰ বাবে প্ৰেৰণ কৰা হৈছে ।
মানচাৰ উপ আৰক্ষী অধীক্ষক গোবিন্দৰ সিঙে কৈছিল যে কিছুমান অচিনাক্ত আক্ৰমণকাৰীয়ে মুছেৱালাৰ ওপৰত গুলীচালনা কৰিছিল । গায়কজনক জীপত তেওঁৰ দুজন বন্ধুৰ সৈতে যাত্ৰা কৰি থকা অৱস্থাত আক্ৰমণ কৰা হৈছিল ।