চিটাৰা ডেস্ক, 29 অক্টোবৰ: বলীউডৰ কুইন কংগনা ৰানাৱট আৰু বিতৰ্ক এটা মুদ্ৰাৰ ইপিঠি-সিপিঠি ৷ প্ৰায়ে নিজৰ বক্তব্যৰ বাবে চৰ্চাত থাকে অভিনেত্ৰীগৰাকী ৷ কংগনা ৰানাৱটে সকলো বিষয়তে নিজৰ মতামত প্ৰকাশ কৰা দেখা যায় । অৱশ্যে এইকেইদিন অভিনেত্ৰীগৰাকী তেওঁৰ ছবি ‘তেজস’ৰ বাবে বাতৰিৰ শিৰোনাম দখল কৰিছে । ২৭ অক্টোবৰত মুক্তি লাভ কৰিছিল কংগনাৰ এই ছবিখন ৷ কিন্তু ছবিখন মুক্তিৰ তিনিদিন নৌহওঁতেই বক্স অফিচত ধৰাশায়ী হ’ল ।
শেহতীয়াকৈ কংগনাই এটা ভিডিঅ’ যোগে অধিক সংখ্যক লোকক থিয়েটাৰলৈ গৈ ছবিখন চাবলৈ আহ্বান জনাইছিল । অভিনেত্ৰীগৰাকীয়ে কয় যে ছবিখনে ইতিবাচক সঁহাৰি লাভ কৰিছে । কিন্তু এই ভিডিঅ’টোৰ পিচতে অভিনেত্ৰীগৰাকীক ছ’চিয়েল মিডিয়া ব্যাপকভাৱে সমালোচনা কৰা পৰিলক্ষিত হৈছে । কিন্তু যিহেতু তেওঁ কংগনা, গতিকে এই সন্দৰ্ভত কেনেকৈনো তেওঁ মনে মনে থাকিব । সমালোচনা কৰা সকলক উভতি ধৰে কংগনাই ।
কি কৈছিল কংগনাই ?
আচলতে ভিডিঅ’টো শ্বেয়াৰ কৰি কংগনাই ‘তেজস’ ছবিখন থিয়েটাৰত চাবলৈ অনুৰাগীক আহ্বান জনাইছিল । লগতে ভিডিঅ’টো শ্বেয়াৰ কৰি এটা কেপচনো লিখিছিল, ‘‘ক’ভিডৰ আগতেই থিয়েটাৰলৈ যোৱা দৰ্শকৰ সংখ্যা বিপুলভাৱে হ্ৰাস পাইছিল, কিন্তু ক’ভিডৰ পিচত পৰিস্থিতি আৰু অধিক বেয়ালৈ গতি কৰে । বহুত থিয়েটাৰ বন্ধ হৈ আছে । বিনামূলীয়া টিকট আৰু যুক্তিসংগত অফাৰৰ পিচতো দৰ্শকৰ সংখ্যা হ্ৰাস পাইয়েই আছে । ৰাইজক চিনেমা হলত চিনেমা চাবলৈ আৰু পৰিয়াল আৰু বন্ধু-বান্ধৱীৰ সৈতে উপভোগ কৰিবলৈ অনুৰোধ জনালো ৷ অন্যথা তেওঁলোক (থিয়েটাৰ) জীয়াই থাকিব নোৱাৰিব ।’’