চিটাৰা ডেস্ক, 18 অক্টোবৰ: বাহুবলীৰ অভিনেতা প্ৰভাসৰ অভিনেত্ৰীৰ সৈতে ঘনিষ্ঠতাৰ খবৰ প্ৰায়ে পোৱা যায় ৷ কেতিয়াবা যদি দক্ষিণৰ অভিনেত্ৰী অনুষ্কা সেনৰ সৈতে তেওঁৰ ঘনিষ্ঠতাৰ খবৰ পোৱা যায়, আন কেতিয়াবা আকৌ অভিনেত্ৰী কৃতি সেননৰ সৈতে তেওঁৰ নাম জড়িত হোৱা দেখা যায় ৷ এইসমূহ খবৰৰ মাজতে এতিয়া প্ৰভাসৰ সন্দৰ্ভত পোহৰলৈ আহিছে এটা ডাঙৰ খবৰ । তেলুগু ছুপাৰষ্টাৰগৰাকীৰ খুৰীয়েক শ্যামলা দেৱীয়ে প্ৰভাসৰ বিয়াৰ পৰিকল্পনা সন্দৰ্ভত প্ৰকাশ কৰিছে মন্তব্য । হয়, প্ৰভাসে কেতিয়া বিয়া পাতিব সেই বিষয়ে প্ৰকাশ কৰিছে তেওঁ ।
বিবাহৰ বিষয়টোক লৈ সংবাদ মাধ্যমৰ প্ৰশ্নৰ উত্তৰ দিলে প্ৰভাসৰ খুৰীয়েক শ্যামলা দেৱীয়ে । সংবাদ মাধ্যমৰ সৈতে হোৱা কথা-বতৰাত শ্যামলা দেৱীয়ে কয়, ‘‘আমাৰ ওপৰত দুৰ্গা মাৰ আশীৰ্বাদ আছে । ঈশ্বৰে আমাৰ সকলোৰে ভালদৰে যত্ন ল’ব । প্ৰভাসৰ বিয়া হ’ব । নিশ্চিতভাৱে হ’ব আৰু অতি সোনকালে হ’ব । আমি আপোনালোক সকলোকে (মিডিয়া) বিয়ালৈ নিমন্ত্ৰণ কৰি উদযাপন কৰিম ।’’
সংবাদ মাধ্যমৰ বাতৰি অনুসৰি প্ৰভাসে ইতিমধ্যে নিজৰ বিয়াৰ স্থানো ঠিক কৰিছে । এইখিনিতে এটা কথা উল্লেখ কৰিব লাগিব যে ‘আদিপুৰুষ’ ছবিখন মুক্তি পোৱাৰ পিচতে কৃতি সেননৰ সৈতে তেওঁৰ ডেটিঙৰ উৰাবাতৰি প্ৰচাৰিত হৈছিল ৷ কিন্তু এই সন্দৰ্ভত কৃতি সেনন কিম্বা প্ৰভাসে কোনো আনুষ্ঠানিক মন্তব্য প্ৰকাশ কৰা নাছিল ৷ এতিয়া তেলুগু ছুপাৰষ্টাৰগৰাকীয়ে অহা বৰ্ষৰ আৰম্ভণিতে নিজৰ বিয়াৰ পৰিকল্পনাৰ কৰিছে বুলি জানিব পৰা গৈছে ।