চিটাৰা ডেস্ক, 16 অক্টোবৰ: বলীউডৰ অভিনেত্ৰী কংগনা ৰানাৱটৰ আগন্তুক ৰাজনীতি ভিত্তিক ছবি ‘ইমাৰ্জেন্সী’ এ সম্প্ৰতি বাতৰিৰ শিৰোনাম দখল কৰিছে ৷ এই ছবিখন কংগনাৰ বাবে অতিকৈয়ে বিশেষ ৷ কাৰণ এই ছবিখনত অভিনয় কৰাৰ সমান্তৰালকৈ কংগনাই এই ছবিখনৰ পৰিচালনাও কৰিছে । এই ছবিখনৰ পৰা কংগনাৰ প্ৰথম লুক অতি আকৰ্ষণীয় আছিল । ছবিখনৰ বাকী চৰিত্ৰসমূহৰ প্ৰথম লুকো ইতিমধ্যে মুকলি কৰা হৈছে । ইয়াৰ পিচতে অনুৰাগীয়ে অতি আগ্ৰহেৰে অপেক্ষা কৰি আছিল ছবিখনৰ বাবে ৷ কিন্তু এতিয়া কংগনাৰ অনুৰাগীৰ এই অপেক্ষা আৰু দীৰ্ঘদিনীয়া হ’ব ৷ কাৰণ ইমাৰ্জেন্সীৰ মুক্তিৰ তাৰিখ পিছুৱাই দিয়া হৈছে ৷ এই খবৰ নিজৰ অনুৰাগীৰ সৈতে খোদ কংগনাই নিজৰ পোষ্টৰ জৰিয়তে শ্বেয়াৰ কৰিছে ।
আজি কংগনা ৰানাৱটে নিজৰ এক্স (পূৰ্বৰ টুইটাৰ) একাউন্টত এটা দীঘলীয়া পোষ্ট শ্বেয়াৰ কৰিছে । ইমাৰ্জেন্সীৰ মুক্তিৰ তাৰিখ সলনি কৰাৰ আঁৰৰ কাৰণো সকলোৰে সৈতে শ্বেয়াৰ কৰিছে অভিনেত্ৰীগৰাকীয়ে । কংগনাই নিজৰ পোষ্টত লিখিছে, ‘‘এটা গুৰুত্বপূৰ্ণ ঘোষণা আছে, ইমাৰ্জেন্সী ছবিখন অভিনেতা হিচাপে মোৰ সমগ্ৰ জীৱনৰ প্ৰচেষ্টা আৰু উপাৰ্জনৰ শিখৰ । ইমাৰ্জেন্সী মোৰ বাবে কেৱল এখন ছবি নহয়, ই ব্যক্তি হিচাপে মোৰ মূল্য আৰু চৰিত্ৰৰ পৰীক্ষা । টিজাৰ আৰু অন্যান্য কথাৰ প্ৰতি সঁহাৰিয়ে সমগ্ৰ দলটোৰ সাহস বৃদ্ধি কৰিছে । মই য’তেই যাওঁ মানুহে মোক ইমাৰ্জেন্সীৰ মুক্তিৰ তাৰিখৰ বিষয়ে সোধে ।’’