চিটাৰা ডেস্ক, 3 আগষ্ট: কলা নিৰ্দেশক নীতিন দেশাইৰ মৃত্যুত শোকস্তব্ধ হৈ পৰিছে তেওঁক ভাল পোৱা লোকসকল ৷ বলীউডৰ বহু তাৰকাই তেওঁৰ মৃত্যুত শোক প্ৰকাশ কৰিছে ৷ বহু ছবিত নিজৰ উৎকৃষ্ট কলা প্ৰদৰ্শন কৰিছে নীতিন দেশাইয়ে । কিন্তু যেন নিমিষতে সকলো শেষ হৈ পৰিল ৷ যোৱা ০২ আগষ্টত নীতিন দেশাইয়ে নিজৰ এন ডি ষ্টুডিঅ’ত চিপ লৈ আত্মহত্যা কৰে । ইফালে তেওঁৰ অকৎস্মাত মৃত্যুক সহজভাৱে ল’ব পৰা নাই পৰিয়ালবৰ্গ আৰু অনুৰাগীয়ে ৷ এতিয়া কোৱা হৈছে যে য’ত নীতিন দেশাইয়ে জীৱনৰ শেষ মুহূৰ্ত পাৰ কৰিছে, সেই একেটা স্থানতে অৰ্থাৎ এন ডি ষ্টুডিঅ’তে তেওঁৰ অন্ত্যেষ্টিক্ৰিয়া সম্পন্ন কৰা হ’ব ।
উল্লেখ্য যে নীতিন দেশাইৰ সন্তান আমেৰিকাত থাকে । পিতৃৰ মৃত্যুৰ খবৰ পোৱাৰ পিচতে আমেৰিকাৰ পৰা ভাৰতলৈ ৰাওনা হৈছে তেওঁৰ সন্তান । পৰিয়ালৰ ফালৰ পৰা কোৱা হৈছে যে যেতিয়া তেওঁৰ সন্তান আহি পাব তেতিয়া নীতিন দেশাইৰ তেওঁৰ ষ্টুডিঅ’ত সম্পন্ন হ’ব অন্ত্যেষ্টিক্ৰিয়া । অনুমান কৰা হৈছে যে শুকুৰবাৰে নীতিন দেশাইৰ অন্ত্যেষ্টিক্ৰিয়া কৰা হ’ব ৷ অৱশ্যে এই সন্দৰ্ভত এতিয়ালৈকে পৰিয়ালে কোনো আনুষ্ঠানিক মন্তব্য প্ৰকাশ কৰা নাই ৷
শেষ দৰ্শনৰ বাবে উপস্থিত হ’ব বলীউডৰ বহু তাৰকা
অমিতাভ বচ্চনৰ পৰা আৰম্ভ কৰি আমিৰ খানলৈকে বহু মহান অভিনেতাৰ সৈতে কাম কৰিছে নীতিন দেশাইয়ে । ৪ বাৰ ৰাষ্ট্ৰীয় বঁটা আৰু ৯ বাৰ ফিল্মফেয়াৰ বঁটা লাভ কৰা নীতিন দেশাই বলীউডৰ তাৰকাসকলৰ হৃদয়ৰ ঘনিষ্ঠ আছিল । অক্ষয় কুমাৰৰ লগত তেওঁৰ বন্ধুত্ব অতি গভীৰ আছিল । খবৰ অনুসৰি বলীউডৰ বহু তাৰকাই তেওঁৰ শেষ ভ্ৰমণৰ সময়ত উপস্থিত থাকিব ৷