চিটাৰা ডেস্ক, 15 নৱেম্বৰ: বলীউডৰ অভিনেতা নানা পাটেকাৰ তেওঁৰ জোৰদাৰ অভিনয় আৰু স্পষ্টবাদী বক্তব্যৰ বাবে পৰিচিত । কিন্তু শেহতীয়াকৈ অভিনেতাগৰাকীৰ এটা ভিডিঅ’ পোহৰলৈ আহিছে, যিটো ভিডিঅ’ চাই হতবাক হৈ পৰিছে অনুৰাগীক । হয়, ভাইৰেল ভিডিঅ’টোত দেখা গৈছে যে নানা পাটেকাৰে এজন ব্যক্তিক পূৰ্ণহতীয়া চৰ সোধায় । দৰাচলতে, নানা পাটেকাৰে বাৰাণসীত তেওঁৰ আগন্তুক ছবি ‘জাৰ্নি’ৰ শ্বুটিং কৰি আছিল আৰু শ্বুটিঙৰ সময়তে এজন ব্যক্তিয়ে তেওঁৰ ওচৰলৈ আহি চেলফি ল’বলৈ ধৰে । কিন্তু লোকজনে হয়তো জনা নাছিল যে এই কথাতে খঙত অগ্নিশৰ্মা হ’ব অভিনেতাগৰাকী ৷ চেলফি ল’বলৈ ধৰোতেই খুব জোৰেৰে অভিনেতাগৰাকীয়ে লোকজনক চৰ মাৰি দিয়ে ।
উল্লেখ্য যে, নানা পাটেকাৰে লোকজনক চৰ মাৰি চেটৰ পৰা খেদি পঠিয়াই দিয়ে । কেৱল ইমানেই নহয়, নানা পাটেকাৰৰৰ লগত থিয় হৈ থকা ক্ৰু মেম্বাৰজনেও যুৱকজনৰ ডিঙিত ধৰি তাৰ পৰা খেদি পঠিয়াই দিয়ে । কিন্তু এতিয়া ছ’চিয়েল মিডিয়াত বনজুইৰ দৰে বিয়পি পৰিছে অভিনেতাগৰাকীৰ এই ভিডিঅ’টো । ভিডিঅ’টো প্ৰকাশ পোৱাৰ পিচতে ছ’চিয়েল মিডিয়াত ব্যাপক প্ৰতিক্ৰিয়াৰ সৃষ্টি হৈছে ৷ নেটিজেনে ভিডিঅ’টোৰ সন্দৰ্ভত নিজৰ মতামত প্ৰকাশ কৰিছে । একাংশ লোকে নানা পাটেকাৰৰ এই কাৰ্যত ব্যাপকভাৱে সমালোচনা কৰিছে । উল্লেখ্য যে, নানা পাটেকাৰে বৰ্তমান বাৰাণসীত জাৰ্নি ছবিৰ শ্বুটিং কৰি আছে । যিটো শেহতীয়াকৈ ঘোষণা কৰিছিল গদৰ ২ৰ পৰিচালক অনিল শৰ্মাই ।
ছ’চিয়েল মিডিয়াত ব্যাপক সমালোচনাৰ সন্মুখীন নানা পাটেকাৰ