চিটাৰা ডেস্ক, 23 নৱেম্বৰ : দক্ষিণৰ অভিনেতা নাগা চৈতন্যই 23 নৱেম্বৰত 36 বছৰ সম্পূৰ্ণ কৰিছে । নাগাৰ জন্ম হৈছিল 1986 চনৰ 23 নৱেম্বৰত হায়দৰাবাদত । টলীউডৰ জনপ্ৰিয় অভিনেতা অক্কিনেনী নাগাৰ্জুনৰ পুত্ৰ নাগা । এই বিশেষ দিনটোত নাগাই তেওঁৰ অনুৰাগীসকলক এক ডাঙৰ উপহাৰ আগবঢ়াইছে । নাগাৰ নতুন ছবি ‘কাষ্টডি’ৰ পৰা তেওঁৰ ফাৰ্ষ্ট লুক মুক্তি দিয়া হৈছে ।
ভেংকট প্ৰভুৰ পৰিচালনাত নিৰ্মিত ‘কাষ্টডি’ ছবিৰ ফাৰ্ষ্ট লুকত নাগাক শক্তিশালী চৰিত্ৰত দেখা গৈছে । আৰক্ষীয়ে অভিনেতাজনক চৌদিশৰ পৰা টানকৈ ঘেৰি ৰাখি তেওঁৰ ফালে বন্দুক টোৱাই থকা দেখা গৈছে । কালৈকো ভ্ৰূক্ষেপ নকৰা নাগাক শক্তিশালী ৰূপত দেখি অনুৰাগী সকল উৎফুল্লিত হৈ পৰিছে ।
‘কাষ্টডি’ ছবিখন নাগাৰ 22 সংখ্যক ছবি । এই ছবিখন তেলুগু আৰু তামিল ভাষাত মুক্তি পাব ৷ এই ছবিখন নিৰ্মাণ কৰিছে ভেংকট প্ৰভুৱে আৰু ছবিখনৰ প্ৰযোজক শ্ৰীনিবাস চিত্তুৰী । ছবিখনৰ বাকী ষ্টাৰ কাষ্টৰ বিষয়ে কোনো তথ্য প্ৰকাশ কৰা হোৱা নাই আৰু ছবিখনৰ মুক্তিৰ তাৰিখ সম্পৰ্কতো একো তথ্য দিয়া হোৱা নাই ।