চিটাৰৈ ডেস্ক, 1 ছেপ্টেম্বৰ: বলীউডৰ অভিনেত্ৰী জেকলিন ফাৰ্নাণ্ডেছে যোৱা কেইবছৰমানৰ পৰা নিজৰ ছবিৰ লগতে ব্যক্তিগত জীৱনকলৈয়ো বহু বাতৰিৰ শিৰোনাম দখল কৰি আহিছে । দৰাচলতে মহা প্ৰৱঞ্চক সুকেশ চন্দ্ৰশেখৰৰ সৈতে ধন সৰবৰাহৰ গোচৰত নাম জড়িত হৈ পৰিছিল জেকলিনৰ ৷
সুকেশ চন্দ্ৰশেখৰৰ সৈতে জেকলিনৰ নাম জড়িত হোৱাৰ পিছৰে পৰা অভিনেত্ৰীগৰাকীয়ে বহু অসুবিধাৰ সন্মুখীন হ’বলগীয়া হৈছে । অভিনেত্ৰীগৰাকীৰ কেৰিয়াৰতো ইয়াৰ প্ৰভাৱ পৰা দেখা পোৱা গৈছিল । এতিয়া আকৌ এবাৰ অভিনেত্ৰীগৰাকীৰ নাম সুকেশ চন্দ্ৰশেখৰৰ সৈতে জড়িত হৈ পৰিছে । এইবাৰ তেওঁৰ নাম সুকেশৰ সৈতে সংযোজন কৰিছে জনপ্ৰিয় পাঞ্জাবী কণ্ঠশিল্পী মিকা সিঙে ।
জিন ক্ল’ড ভ্যান ডেমৰ সৈতে ভাইৰেল জেকলিনৰ এখন ছবি
আচলতে শেহতীয়াকৈ অভিনেত্ৰীগৰাকীয়ে নিজৰ টুইটাৰ হেণ্ডেলত হলিউডৰ তাৰকা জিন ক্ল’ড ভ্যান ডেমৰ সৈতে এখন ছবি শ্বেয়াৰ কৰিছিল । এই ছবিখন শ্বেয়াৰ কৰি অভিনেত্ৰীগৰাকীয়ে কেপচনত লিখিছে যে ‘লিজেণ্ড ভ্যান ডেমৰ সৈতে সহযোগিতা কৰিবলৈ অপেক্ষা কৰিব নোৱাৰি ।’ অভিনেত্ৰীগৰাকীৰ এই ফটোখন অতি কম সময়ৰ ভিতৰতে ভাইৰেল হৈ পৰে ছ’চিয়েল মিডিয়াত ৷ ছবিখনক লৈ বিভিন্ন জনৰ ভিন্ন মতামত ৷ একাংশই তেওঁলোকৰ আগন্তুক প্ৰজেক্টক লৈ সুখ প্ৰকাশ কৰাৰ বিপৰীতে বহুতে তেওঁলোকৰ সম্পৰ্কক লৈও জল্পনা-কল্পনা কৰিছে ।