চিটাৰা ডেস্ক, 31 জানুৱাৰী :বলীউডৰ প্ৰবীণ অভিনেত্ৰী নীনা গুপ্তাৰ কন্যা অভিনেত্ৰী তথা বিখ্যাত ড্ৰেছ ডিজাইনাৰ মাচাবা গুপ্তা অলপতে বিবাহ পাশত আৱদ্ধ হয় ৷ অভিনেতা সত্যদীপ মিশ্ৰৰ সৈতে জীৱনৰ নতুন অধ্যায়ৰ পাতনি মেলে মাচাবাই । ছ’চিয়েল মিডিয়াত সক্ৰিয় মাচাবাই প্ৰায়ে এটাতকৈ অধিক পোষ্ট শ্বেয়াৰ কৰি অনুৰাগীসকলক নিজৰ ব্যক্তিগত আৰু পেছাদাৰী জীৱনৰ বিষয়ে অৱগত কৰি ৰাখে । শেহতীয়াকৈ ছ’চিয়েল মিডিয়াত তেওঁ পৰিয়ালৰ সদস্যসকলৰ বাবে এটা বিশেষ পোষ্ট শ্বেয়াৰ কৰি নিজৰ হৃদয়ৰ অনুভৱ ব্যক্ত কৰিছে ৷
বিয়াৰ দিনা আৱেগিক হৈ পৰিছিল মাচাবা গুপ্তা ৷ জীৱনৰ বিশেষ দিনটোত প্ৰথমবাৰৰ বাবে গোটেই পৰিয়ালটো একেলগে হৈছিল যিয়ে সুখী কৰি তুলিছিল মাচাবাক ৷ সকলোৱে মিলিজুলি তুলিলে এখন সম্পূৰ্ণ পাৰিবাৰিক ফটো ৷ এতিয়া মাচাবা গুপ্তাই তেওঁৰ Insta story ত পৰিয়ালৰ সৈতে তেওঁৰ বিয়াৰ নেদেখা ফটো শ্বেয়াৰ কৰিছে (masaba gupta instagram) ।
বিশেষ কথাটো হ’ল শ্বেয়াৰ কৰাৰ সমান্তৰালকৈ প্ৰতিখন ফটোতে প্ৰেমভাৱেৰে সকলোৰে বাবে নিজৰ মনৰ ভাৱ প্ৰকাশ কৰি লিখিছে । মাচাবাই তিনিখন ছবি শ্বেয়াৰ কৰিছে ধাৰাবাহিকভাৱে । তিনিখন ছবিৰ ভিতৰত এখনত আছে ক্ৰিকেট কিংবদন্তি তথা পিতৃ ভিভ ৰিচাৰ্ডছ, এখনত আছে ষ্টেপফাডাৰ বিবেক মেহৰা আৰু এখনত আছে মাতৃ নীনা গুপ্তা ।