চিটাৰা ডেস্ক, 24 জুলাই: ছবিৰ জৰিয়তে ভাৰতৰ কাহিনী দেখুৱাইছিল তেওঁ । ৰোমাঞ্চ আৰু ট্ৰেজেডীৰ যুগত তেওঁ ছবি জগতক এক নতুন দিশ দেখুৱাইছিল । হয়, আমি কৈছোঁ ১৯৩৭ চনৰ ২৪ জুলাইত এবটাবাদত (বৰ্তমান পাকিস্তানত থকা ঠাই) জন্মগ্ৰহণ কৰা মনোজ কুমাৰৰ কথা ৷ তেওঁৰ প্ৰকৃত নাম হৰিকৃষ্ণ গিৰি গোস্বামী । জন্মদিনৰ বিশেষ ক্ষণত তেওঁৰ জীৱনৰ কিছু নজনা কাহিনীৰ বিষয়ে জানো আহক ।
কিয় নাম সলনি কৰিছিল অভিনেতাগৰাকীয়ে ?
মনোজ কুমাৰেও দেশ বিভাজনৰ বোজা বহন কৰিবলগীয়া হৈছিল । মাত্ৰ ১০ বছৰ বয়সত বিভাজনৰ কাৰণে তেওঁৰ পৰিয়াল পাকিস্তান এৰি দিল্লীলৈ আহিছিল । কিংছৱে কেম্পত কিছুদিন কটোৱাৰ পিচত তেওঁ পুৰণি ৰাজেন্দ্ৰ নগৰত থাকিবলৈ আৰম্ভ কৰে আৰু দিল্লী বিশ্ববিদ্যালয়ৰ হিন্দু মহাবিদ্যালয়ৰ পৰা স্নাতক ডিগ্ৰী লাভ কৰে । ইয়াৰ পিচত তেওঁ ছবিজগতত নিজৰ ভাগ্য পৰীক্ষা কৰাৰ পৰিকল্পনা আৰম্ভ কৰে ।
আচলতে মনোজ কুমাৰে ছবি চাই ভাল পাইছিল আৰু দিলীপ কুমাৰৰ অনুৰাগী আছিল তেওঁ ৷ দিলীপ কুমাৰৰ ছবি ‘শবনাম’ মুক্তি পোৱাৰ সময়ত তেওঁৰ চৰিত্ৰটোৰ নাম আছিল মনোজ কুমাৰ । এই ছবি আৰু চৰিত্ৰটো হৰিকৃষ্ণ গিৰি গোস্বামীয়ে ইমানেই ভাল পাইছিল যে ছবি জগতত খোজ দিওঁতে তেওঁ নিজৰ নাম সলনি কৰি মনোজ কুমাৰ কৰি লৈছিল ।
প্ৰথমখন ছবিতে মগনিয়াৰৰ চৰিত্ৰত অভিনয় কৰিছিল
‘শ্বহীদ’, ‘ৱহ কৌন থি’, ‘ৰোটি কাপড়া অৰ মকান’, ‘পুৰব আৰু পশ্চিম’, ‘উপকাৰ’কে ধৰি বহুকেইখন হিট ছবিত নিজৰ বলিষ্ঠ অভিনয় প্ৰদৰ্শন কৰা মনোজ কুমাৰে ১৯৫৭ চনত লেখৰাজ ভাকীৰ ‘ফেশ্বন’ ছবিৰে নিজৰ চলচ্চিত্ৰ যাত্ৰা আৰম্ভ কৰিছিল । এই ছবিখনত তেওঁ ৯০ বছৰীয়া মগনিয়াৰৰ চৰিত্ৰত অভিনয় কৰিছিল।