চিটাৰা ডেস্ক, 24 অক্টোবৰ:দক্ষিণৰ ছুপাৰষ্টাৰ থালাপথী বিজয়ৰ অভিনীত ছবি ‘লিঅ’ মুক্তিৰ আজি ছয় দিন পাৰ হ’ল ৷ কিন্তু মুক্তিৰ প্ৰথম দিনাৰ পৰাই বক্স অফিচত ধুমুহাৰ সৃষ্টি কৰিছে ছবিখন ৷ বক্স অফিচত ছবিখনৰ উৎকৃষ্ট প্ৰদৰ্শনৰ পৰা ক’ব পাৰি যে এই ছবিখনক দৰ্শকে পছন্দ কৰিছে । ইয়াৰ মাজতে এতিয়া লিঅ’ৰ পৰিচালক লোকেশ কানাগৰাজ বিষয়ে এটা খবৰ পোৱা গৈছে ৷ দৰাচলতে পৰিচালক কানাগৰাজ আহত হোৱাৰ খবৰ পোৱা গৈছে । তথ্য অনুসৰি কেৰালাত আয়োজিত লিঅ’ ছাকচেছ মিটৰ সময়তে আহত হয় লোকেশ । ছবিৰ প্ৰচাৰৰ বাবে পলাক্কাডৰ আৰোমা থিয়েটাৰত উপস্থিত হোৱা লোকেশ কানাগৰাজক চাবলৈ অনুৰাগীয়ে ভিৰ কৰিছিল ।
পৰিচালকজনক এবাৰ ওচৰৰ পৰা চাবলৈ অহা ভিৰৰ পৰা হুলস্থুলৰ সৃষ্টি হৈছিল, য’ত পৰিচালক লোকেশ আঘাতপ্ৰাপ্ত হয় । একে সময়তে অনুৰাগীৰ বিশাল অনিয়ন্ত্ৰিত ভিৰ নিয়ন্ত্ৰণ কৰিবলৈ আৰক্ষীয়ে লাঠিচাৰ্জৰ আশ্ৰয় ল’বলগীয়া হৈছিল । যদিও লিঅ’ ছবিৰ কেৰালা বিতৰক গোকুলাম মুভিজে থিয়েটাৰ প্ৰচাৰৰ সম্পূৰ্ণ নিৰাপত্তাৰ ব্যৱস্থা কৰিছিল কিন্তু অনুৰাগীয়ে সকলো বাধাকো আওকাণ কৰি নিয়ন্ত্ৰণৰ বাহিৰত গুচি যায় । যাৰ ফলত লোকেশৰ ভৰিত আঘাত লাভ কৰে । ইয়াৰ পিচত পৰিচালকজনে পলাক্কাড কাৰ্যসূচীৰ পৰা উভতি অহাৰ সিদ্ধান্ত লয় ।