চিটাৰা ডেস্ক, 6মে’ : দক্ষিণৰ চুপাৰষ্টাৰ যশৰ ছবি 'কেজিএফ: চেপ্টাৰ ২'য়ে বক্স অফিচত বিপুল সফলতা লাভ কৰিবলৈ সক্ষম হৈছে । ছবিখনে ১৪ এপ্ৰিলত মুক্তি লাভ কৰিছিল । মুক্তিৰ দিনাৰ পৰাই অধিক মাত্ৰাত উপাৰ্জন কৰি আহিছে চলচ্চিত্ৰখনে (KGF 2 box office collection) ৷
প্ৰশান্ত নীলৰ পৰিচালিত 'কেজিএফ-২'য়ে গঢ়িছে এটা নতুন অভিলেখ (KGF 2 records)। বাণিজ্য বিশ্লেষকসকলৰ মতে, 'কেজিএফ ২' হিন্দী চলচ্চিত্ৰৰ দ্বিতীয় সৰ্বাধিক উপাৰ্জনকাৰী ছবি হৈ পৰিছে । এই যুঁজত ছবিখনে বলীউডৰ চুপাৰষ্টাৰ আমিৰ খানৰ 'দঙ্গল'ক অতিক্ৰম কৰিছে ।
বাণিজ্য বিশ্লেষক তৰণ আদৰ্শই প্ৰকাশ কৰিছে যে 'কেজিএফ ২'য়ে বক্স অফিচত উপাৰ্জনৰ ক্ষেত্ৰত আমিৰ খান অভিনীত ব্লকবাষ্টাৰ ছবি 'দঙ্গল' আৰু এছ এছ ৰাজামৌলীৰ শেহতীয়া মুক্তিপ্ৰাপ্ত 'আৰআৰআৰ'ক অতিক্ৰম কৰিছে ।
হিন্দী সংস্কৰণত চলচ্চিত্ৰখনৰ উপাৰ্জন
'বাহুবলী 2'য়ে হিন্দী সংস্কৰণত মুঠ 510.99 কোটি টকা উপাৰ্জন কৰিছিল ৷ আনহাতে 'আৰআৰআৰ'য়ে 360.31 কোটি টকা উপাৰ্জন কৰিবলৈ সক্ষম হৈছিল । শেহতীয়াকৈ তাৰকা যশৰ ছবি 'কেজিএফ 2'য়ে হিন্দী সংস্কৰণত 391.65 কোটি টকা উপাৰ্জন কৰিছে । 'বাহুবলী-2' বোলছবিখন হিন্দী সংস্কৰণৰ উপাৰ্জনৰ তালিকাত শীৰ্ষ স্থানত আছে ।