চিটাৰা ডেস্ক, 3 অক্টোবৰ :কৰীণা কাপুৰ খানৰ প্ৰতিটো ষ্টাইলেই মানুহক আকৰ্ষণ কৰে । ফেশ্বন ষ্টেটমেণ্টৰ বাবে প্ৰায়ে লাইমলাইটত থাকে কৰীণা । শেহতীয়াকৈ মুম্বাই বিমান বন্দৰটো আকৰ্ষণীয় ৰূপত কৰীণাক দেখা গৈছিল । তেওঁৰ সৈতে বিমান বন্দৰত পুত্ৰ জেহো উপস্থিত আছিল । এফালে কৰীণাৰ ষ্টাইলিছ লুকে মানুহৰ দৃষ্টি আকৰ্ষণ কৰাৰ বিপৰীতে আনফালে তেওঁৰ শান্ত আচৰণে তেওঁৰ অনুৰাগীৰ হৃদয় জয় কৰিছিল ।
বিমান বন্দৰত বলীউড তাৰকাসকলৰ সৈতে ফটো উঠিবলৈ অনুৰাগীসকলে প্ৰায়ে ভিৰ কৰে ৷ কিন্তু তাৰ মাজতে কেতিয়াবা অনুৰাগীৰ কৰ্মৰ বাবে অপ্ৰস্তুত হ’বলগীয়া হয় তাৰকাসকল ৷ কৰীণাৰ সৈতেও শেহতীয়াকৈ এনে এক ঘটনাই ঘটিলে ৷ গাড়ীৰ পৰা নমাৰ পিছতেই এজন অনুৰাগীয়ে ক’ৰবাৰ পৰা আহি আগভেটি ধৰিলেহি কৰীণাক ৷ তেওঁ অভিনেত্ৰীগৰাকীৰ কান্ধত হাত থ’বলৈ চেষ্টা কৰিছিল । তাৰ পিছত আৰু একাংশ অনুৰাগীয়ে তেওঁক আগুৰি ধৰি হাৰাশাস্তি কৰে । কৰীণাৰ ওচৰত গৈ ফটো তোলাৰ আগত কোনো এজন অনুৰাগীয়েও তেওঁৰ অনুমতি লোৱা নাছিল ৷