তিনি ৰাজ্যত বিজেপিৰ বিজয় যাত্ৰা; প্ৰধানমন্ত্ৰী মোদীক শ্ৰীৰামৰ সৈতে তুলনা কংগনা ৰনৌতৰ

প্ৰধানমন্ত্ৰী নৰেন্দ্ৰ মোদীক শ্ৰী ৰামৰ সৈতে তুলনা কংগনাৰ ৷ দৰাচলতে তিনিখন ৰাজ্যত ভাৰতীয় জনতা পাৰ্টীৰ বিজয় উদযাপন কৰিছে কংগনা ৰনৌতে । ইফালে কংগনাৰ এই মন্তব্যৰ পিচতে ছ’চিয়েল মিডিয়াত ব্যাপকভাৱে ট্ৰ’ল হয় ৷

চিটাৰা ডেস্ক, ৩ ডিচেম্বৰ: আজি দেশৰ চাৰি ৰাজ্যৰ বিধানসভা নিৰ্বাচনৰ ফলাফল ঘোষণাৰ দিন ৷ এই চাৰি ৰাজ্য হৈছে মধ্য প্ৰদেশ, ছত্তীশগড়, ৰাজস্থান আৰু তেলেংগানা ৷ ইয়াৰে তিনিখন ৰাজ্যত (মধ্য প্ৰদেশ, ছত্তীশগড় আৰু ৰাজস্থান) ভাৰতীয় জনতা পাৰ্টীৰ জয় নিশ্চিত হোৱাৰ পিচতে ছ’চিয়েল মিডিয়াৰ জৰিয়তে বলীউডৰ অভিনেত্ৰী কংগনা ৰনৌতে অভিনন্দন জ্ঞাপন কৰে ।

নিজৰ এক্স একাউন্টত অভিনেত্ৰীগৰাকীয়ে ৰাজ্যসমূহত বিজেপিৰ সফলতাৰ বাবে প্ৰধানমন্ত্ৰী নৰেন্দ্ৰ মোদীক শ্ৰী ৰামৰ সৈতে তুলনা কৰি এখন ছবি শ্বেয়াৰ কৰিছে । অভিনেত্ৰীগৰাকীৰ এই পোষ্টৰ পিচতে ছ’চিয়েল মিডিয়াত ব্যাপকভাৱে ট্ৰ’ল হ’বলগীয়া হয় ৷ সমালোচনাৰ মাজতে কংগনাই নিজৰ স্থিতি স্পষ্ট কৰি উল্লেখ কৰিলে ভাগৱতৰ কথা ।

ৰাজস্থান, মধ্যপ্ৰদেশ, তেলেংগানা আৰু ছত্তীশগড়ৰ বিধানসভা নিৰ্বাচনৰ ভোট গণনা চলি আছে । প্ৰাৰম্ভিক ধাৰাসমূহে ৰাজস্থান, মধ্যপ্ৰদেশ আৰু ছত্তীশগড়ত বিজেপিৰ জয় এক প্ৰকাৰে নিশ্চিত কৰিছে ৷ অৱশ্যে তেলেংগানাত কংগ্ৰেছ আগবাঢ়ি আছে ।

ইফালে তিনি ৰাজ্যত বিজেপিৰ জয় এক প্ৰকাৰে নিশ্চিত হোৱাত প্ৰধানমন্ত্ৰী মোদীক শ্ৰী ৰামৰ সৈতে তুলনা কৰি কংগনা ৰনৌতে নৰেন্দ্ৰ মোদীৰ এখন ফটো এক্সত পোষ্ট কৰি হিন্দীত লিখিছে, "শ্ৰী ৰাম আহিছে # নিৰ্বাচনৰ ফলাফল ।"

কংগনাৰ এই তুলনাৰ পিচতে ক্ষুব্ধ হৈ পৰে নেটিজেন ৷ এজন ব্যৱহাৰকাৰীয়ে হিন্দু ধৰ্মত ইয়াৰ বৈধতাক লৈ প্ৰশ্ন উত্থাপন কৰিছে । ইয়াৰ উত্তৰত অভিনেত্ৰীগৰাকীয়ে ভাগৱতৰ উদ্ধৃতি দি উত্তৰ দি কয়, "হয়, অনুমতি আছে । শ্ৰী কৃষ্ণই গীতাত কৈছে যে মই মোৰ প্ৰকৃত ভক্তৰ সৈতে একেই, তেওঁৰ আৰু মোৰ মাজত কোনো পাৰ্থক্য নাই, আমাৰ ইমান মৰমলগা আৰু চিলড আউট ভগৱান আছে ! মূৰ কাটিব নালাগে, চাবুকেৰে কোবাব নালাগে, আপুনিও আমাৰ দললৈ আহক ।"

লগতে পঢ়ক:‘‘সমগ্ৰ দেশৰে নাগৰিকৰ হৃদয়ত আছে প্ৰধানমন্ত্ৰী মোদী’’: সাধ্বী প্ৰজ্ঞা সিং ঠাকুৰ

লগতে পঢ়ক:চন্দ্ৰশেখৰৰ ছন্দ পতন: মুখ্যমন্ত্ৰীৰ পদৰ পৰা পদত্যাগ তেলেংগানাৰ মুখ্যমন্ত্ৰী কেচিআৰৰ