চিটাৰা ডেস্ক, ৭ ছেপ্টেম্বৰ: শ্বাহৰুখ খানৰ অভিনীত বহু প্ৰত্যাশিত ছবি ‘জৱান’কলৈ সম্প্ৰতি দেশজুৰি চৰ্চা চলিছে ৷ আজিৰ পৰা অৰ্থাৎ ৭ ছেপ্টেম্বৰৰ পৰা ছবিগৃহত মুক্তি লাভ কৰিছে ‘জৱান’ । অভিনেতাজনৰ অনুৰাগীৰ মাজত এই ছবিখনৰ মুক্তিক লৈ যি উৎসাহ দেখা গৈছে সেয়া কোনো উৎসৱতকৈও কম নহয় ।
‘জৱান’ৰ বাবেই দেশৰ বহু ৰাজ্যত পুৱাৰে পৰা প্ৰথম শ্ব’ আৰম্ভ হৈছে ৷ পুৱাই এই ছবিখন উপভোগ কৰিবলৈ শ শ অনুৰাগী উপস্থিত হৈছে ছবিগৃহত আৰু নিজৰ প্ৰিয় অভিনেতাৰ ছবিখনৰ বাবে ক্ৰেজ প্ৰকাশ কৰিছে ৷ ইফালে অনুৰাগীৰ ক্ৰেজ দেখি পুৱাৰ নিশাই টুইটযোগে প্ৰতিক্ৰিয়া প্ৰকাশ কৰিছে শ্বাহৰুখ খানে ।
শ্বাহৰুখ খানৰ হৃদয় জয় কৰিলে অনুৰাগীয়ে
‘জৱান’ মুক্তিৰ দিনা পুৱতি নিশা শ্বাহৰুখ খানে নিজৰ অফিচিয়েল টুইটাৰ হেণ্ডেলত এটা টুইট কৰিছে । এই টুইটত কিং খানে এটা ভিডিঅ’ সন্নিবিষ্ট কৰিছে, যিটো ভিডিঅ’ত দেখা গৈছে অনুৰাগীৰ ক্ৰেজ । এই ভিডিঅ’টোত স্পষ্টকৈ দেখা গৈছে যে, অভিনেতাগৰাকীৰ ফেন পেজ শ্বাহৰুখ ইউনিভাৰ্ছ ফেন ক্লাবৰ সদস্যসকলে ছবিখনৰ পুৱাৰ শ্ব’ৰ পূৰ্বে বৃহৎ সংখ্যকে হাতত ‘জৱান’ৰ বেনাৰ ধৰি অভিনেতাজনৰ চিনেমাখনৰ প্ৰচাৰ কৰা দেখা গৈছে ৷ লগতে পুৱাৰ প্ৰথম শ্ব’টো উদযাপন কৰা দেখা গৈছে ।