Kamal Haasan In Project K: প্ৰজেক্ট কেত কমল হাছানৰ প্ৰৱেশ, বহু বছৰ পিচত পুনৰ এবাৰ অমিতাভ বচ্চনৰ সৈতে দেখা যাব কমলক

প্ৰজেক্ট কেৰ অংশ হ’ব দক্ষিণৰ ছুপাৰষ্টাৰ কমল হাছান । এই সন্দৰ্ভত আনুষ্ঠানিক ঘোষণা কৰা হৈছে । এই ছবিখনত পুনৰ এবাৰ একেলগে দেখা পোৱা যাব অমিতাভ বচ্চন আৰু কমল হাছানক ৷

চিটাৰা ডেস্ক, 25 জুন: আদিপুৰুষে লাভ কৰা তীব্ৰ প্ৰতিক্ৰিয়াৰ মাজতে প্ৰভাসৰ আন এখন ছবি সন্দৰ্ভত পোহৰলৈ আহিছে তথ্য । ছুপাৰষ্টাৰগৰাকীৰ ছবি ‘প্ৰজেক্ট কে’ক লৈ বহুদিনৰে পৰা চৰ্চা চলি আছিল ৷ অৱশেষত ছবিখনৰ সন্দৰ্ভত পোহৰলৈ আহিছে অভিনেতা-অভিনেত্ৰীৰ নাম । নতুন খবৰ অনুসৰি কমল হাছানকো দেখা যাব ছবিখনত । বিগত সময়ত ছ’চিয়েল মিডিয়াত যথেষ্ট চৰ্চা হৈছিল যে ছবিখনত কমল হাছানকো দেখা পোৱা যাব ৷ কিন্তু এই সন্দৰ্ভত কোনো আনুষ্ঠানিক খবৰ অহা নাছিল ৷ এতিয়া আনুষ্ঠানিকভাৱে ঘোষণা কৰা হৈছে যে প্ৰভাসৰ এই বিশাল ছবিখনৰ অংশ হ’ব কমল হাছান ৷

শেহতীয়াকৈ বাণিজ্য বিশ্লেষক তৰণ আদৰ্শে এটা ভিডিঅ’ শ্বেয়াৰ কৰিছে। য’ত কমল হাছানে অভিনয় কৰা চৰিত্ৰসমূহৰ ভিজুৱেল দেখা যায় । লগতে এটা চুটি ভিডিঅ’ৰ সৈতে পৰিচয় দিয়া হৈছে । ইয়াত লিখা আছে-ডাঙৰ খবৰ, অমিতাভ বচ্চন, প্ৰভাস, দীপিকা পাডুকন আৰু দিশা পাটানীৰ পিচত এতিয়া কমল হাছানেও এই ছবিখনত যোগ দিব । নাগ অশ্বিনে পৰিচালনা কৰিব আৰু ব্যজয়ন্তী মুভিজৰ বেনাৰত নিৰ্মাণ হ’ব ছবিখন ।

ইফালে প্ৰডাকচন হাউছ ব্যজয়ন্তী মুভিজে হাছানৰ বিষয়ে নিজৰ অফিচিয়েল টুইটাৰ পেজত ঘোষণা কৰিছে ৷ টুইট কৰি লিখিছে, "শ্ৰেষ্ঠ অভিনেতা উলাগানায়াগানক @ikamalhaasan ক আদৰণি জনাইছো । আমাৰ যাত্ৰা এতিয়া ইউনিভাৰ্চেল হৈ পৰিছে। #ProjectK।"

কিছুদিন পূৰ্বে তথ্য পোহৰলৈ আহিছিল যে ছবি প্ৰজেক্ট কেত কমল হাছানে মুখ্য খলনায়কৰ চৰিত্ৰত অভিনয় কৰিব আৰু ইয়াৰ বাবে মেগাষ্টাৰজনক যথেষ্ট মাচুল দিয়া হৈছে । সংবাদ মাধ্যমৰ খবৰ অনুসৰি অভিনেতাগৰাকীক এই ছবিখনৰ বাবে ১৫০ কোটি টকাৰ প্ৰস্তাৱ দিয়া হৈছিল । কিন্তু এই খবৰৰ কোনো নিশ্চয়তা প্ৰকাশ কৰা নাই নিৰ্মাতাসকলে । বৰ্তমান সময়ত ছবিখনত কমল হাছানৰ ভূমিকা কেনেকুৱা হ’ব সেই সন্দৰ্ভত কোনো তথ্যও শ্বেয়াৰ কৰা হোৱা নাই।

বিগ বি-কমল হাছানক পূৰ্বেও একেলগে পৰ্দাত দেখা পোৱা গৈছে

কমল হাছানৰ কথা ক’বলৈ গ’লে তেওঁ অনুৰাগীৰ অন্যতম প্ৰিয় অভিনেতা আৰু তেওঁৰ প্ৰতিভাৰ প্ৰতি সকলো অৱগত । বলীউডৰ বহু ছবিতো কাম কৰিছে অভিনেতাগৰাকীয়ে । ইয়াৰ পূৰ্বে অভিনেতাগৰাকীয়ে অমিতাভ বচ্চনৰ সৈতে এৰেষ্টেড আৰু খবৰদাৰৰ দৰে ছবিত অভিনয় কৰিছিল । এতিয়া আকৌ এবাৰ বহুদিনৰ মূৰত দুয়োজন অভিনেতাই একেলগে পৰ্দা শ্বেয়াৰ কৰা দেখা যাব । মেগা বাজেটৰ এই ছবিখনে দৰ্শকৰ কেনে সঁহাৰি লাভ কৰে সেয়া মুক্তিৰ পিচত হে দেখা যাব ৷

লগতে পঢ়ক:Karishma Kapoor Birthday: ৯০ৰ দশকৰ পৰা বলীউডত শাসন কৰা অভিনেত্ৰী কৰিশ্মাৰ বিষয়ে জানো আহক