চিটাৰা ডেস্ক, 9 মাৰ্চ: নিজৰ কৌতুক অভিনয়ৰে দৰ্শকক হাঁহিৰ খোৰাক দি অহা যশস্বী অভিনেতা তথা পৰিচালক সতীশ কৌশিকে আজি সকলোকে কন্দুৱাই গুচি গ’ল (Satish Kaushik passes away) ৷ বলিষ্ঠ অভিনেতা তথা পৰিচালকগৰাকী ৬৬ বছৰ বয়সত হৃদৰোগত আক্ৰান্ত হৈ ইহলীলা সম্বৰণ কৰে ৷ অভিনেতাগৰাকীৰ মৃত্যুৰ পিচতে বলীউডত শোকৰ ছাঁ পৰিছে ৷ হানছাল মেহতা, ছোনী ৰাজদান, মনোজ বাজপেয়ী, কংগনা ৰানাৱটৰ দৰে চলচ্চিত্ৰ জগতৰ বহু অভিনেতা-অভিনেত্ৰী সামাজিক মাধ্যমযোগে প্ৰবীণ অভিনেতাগৰাকীৰ মৃত্যুত শোক প্ৰকাশ কৰে ৷
যশস্বী অভিনেতাগৰাকীৰ ঘনিষ্ঠ বন্ধু তথা সহকৰ্মী অনুপম খেৰে পিটিআইক জনাই যে, তেওঁ দিল্লীৰ এজন বন্ধুৰ ঘৰত আছিল । হঠাৎ অস্বস্তি অনুভৱ কৰাত ড্ৰাইভাৰজনক হাস্পতাললৈ লৈ যাবলৈ ক’লে। কিন্তু দুৰ্ভাগ্যবশতঃ আদবাটতে হাৰ্ট এটেক হয় ৷ পুৱতি নিশাৰ 1 বজাত হৃদৰোগত আক্ৰান্ত হয় তেওঁ ৷ ইয়াৰ পূৰ্বে অভিনেতা অনুপম খেৰে কৌশিকৰ মৃত্যুৰ খবৰ টুইটাৰ যোগে শ্বেয়াৰ কৰিছিল (Film celebrities mourn Actor director Satish) ।
টুইটাৰত অনুপন খেৰে লিখিছিল,"মই জানো যে মৃত্যু এই পৃথিৱীৰ চূড়ান্ত সত্য ! কিন্তু মই মোৰ সপোনতো ভবা নাছিলোঁ যে মই এদিন মোৰ প্ৰিয় বন্ধুৰ মৃত্যুৰ খবৰ সামাজিক মাধ্যমত লিখিম । ৪৫ বছৰৰ বন্ধুত্বৰ হঠাৎ ফুল ষ্টপ !! সতীশ অবিহনে জীৱনটো কেতিয়াও আগৰ দৰে নহ’ব !"
ইফালে চলচ্চিত্ৰ নিৰ্মাতা হানছাল মেহতাই তেওঁৰ বিষয়ে কয়," সতীশ জী আপুনি অতি সোনকালেই গুচি গ’ল । বহুত মনত পৰিব আপুনি ৷ উন্নত চৰিত্ৰৰ প্ৰতি আপোনাৰ ক্ষুধা, গল্পৰ প্ৰতি থকা আকৰ্ষণ আৰু জীৱনৰ প্ৰতি থকা আপোনাৰ প্ৰেমৰ প্ৰতিস্থাপন সেয়া অপূৰণীয় । আমাৰ ছবি "এজন পৰিচালকৰ মৃত্যু" এতিয়া আৰু এখন ছবি নহয় । ওম শান্তি ।"
অভিনেতা-পৰিচালক ছোনী ৰাজদানে কয়," আমাৰ সমসাময়িক @satishkaushik2 আৰু নাই বুলি শুনি স্তম্ভিত হৈছো । তেওঁৰ সৈতে মাণ্ডী ছবিখনৰ শ্বুটিং কৰি থাকোঁতে প্ৰথমবাৰৰ বাবে তেওঁক লগ পাইছিলোঁ । তেওঁ আছিল সদায় হাঁহি থকা এজন আনন্দময় কোমল অন্তৰৰ লোক । তেওঁ নাই বুলি বিশ্বাস কৰিবলৈ বৰ কঠিন । RIP প্ৰিয় সতীশ, আপোনাক মিছ কৰিম।"
আনফালে কৌশিকৰ অৱসান ছবি জগতৰ বাবে এক বৃহৎ ক্ষতি বুলি কয় মনোজ বাজপেয়ীয়ে । তেওঁ সামাজিক মাধ্যমত লিখিছে," খবৰটো পঢ়ি হতভম্ব হৈছো ! চলচ্চিত্ৰ উদ্যোগটোৰ বাবে আৰু তেওঁৰ পৰিয়ালৰ বাবে এয়া এক ডাঙৰ ক্ষতি ! তেওঁৰ পৰিয়াল আৰু বন্ধুবৰ্গলৈ সমবেদনা ! আপুনি শান্তি লাভ কৰক সতীশ ভাই ৷"
বলীউডৰ কুইন কংগনা ৰানাৱটে কয়," এক ভয়ংকৰ খবৰ পাই সাৰ পাই উঠিলো ৷ তেওঁ আছিল মোৰ আটাইতকৈ ডাঙৰ চিয়াৰলিডাৰ তথা এজন অতি সফল অভিনেতা আৰু পৰিচালক #সতীশকৌশিক জী ব্যক্তিগতভাৱেও আছিল এজন অতি দয়ালু আৰু প্ৰকৃত মানুহ ৷ তেওঁক মিছ কৰিম, ওম শান্তি ।"
অভিনেতা অভিষেক বচ্চনে কয় যে অভিনেতাজনৰ মৃত্যুৰ খবৰ পাই তেওঁ “হতভম্ব” হৈ পৰিছে । অভিষেক বচ্চনে কয়, "এজন অতি কোমল, দয়ালু আৰু মৰমিয়াল ব্যক্তি । সদায় সুখী আৰু হাঁহিমুখীয়া । আমাৰ চলচ্চিত্ৰ উদ্যোগৰ বাবে এক বৃহৎ ক্ষতি । শান্তিৰে জিৰণি লওক প্ৰিয় সতীশ ককা । আমি সকলোৱে আপোনাক মিছ কৰিম ।"