চিটাৰা ডেস্ক, 31 অক্টোবৰ: এই বছৰটো শ্বাহৰুখ খানৰ বাবে যথেষ্ট ব্লকবাষ্টাৰ আছিল । বছৰৰ আৰম্ভণিতে তেওঁৰ ছবি পাঠান ছবিগৃহত মুকলি হৈছিল আৰু তাৰ ঠিক ৭ মাহৰ পিচত অৰ্থাৎ ছেপ্টেম্বৰ মাহত মুক্তি লাভ কৰিছিল এই বৰ্ষৰ তেওঁৰ দ্বিতীয়খন ছবি জৱান । দুয়োখন চিনেমাই পৰ্দাত নতুন অভিলেখ গঢ়িবলৈ সক্ষম হয় ৷ এতিয়া ২০২৩ বৰ্ষৰ শেষত ৰিলিজ হ’ব কিং খানৰ তৃতীয়খন ছবি ‘ডাংকি’ ৷
বৰ্তমান বছৰটোৰ তৃতীয়খন ডাঙৰ ছবি ডাংকিক লৈ চৰ্চাত আছে অভিনেতাগৰাকী । শেহতীয়াকৈ ছবিখনৰ মুক্তিৰ তাৰিখ ঘোষণা কৰা হৈছে । এতিয়া ডাংকিৰ টিজাৰ মুক্তিৰ তাৰিখে ছ’চিয়েল মিডিয়াত আলোড়নৰ সৃষ্টি কৰিছে । এতিয়া প্ৰশ্ন হয় কেতিয়া মুক্তি পাব ডাংকিৰ টিজাৰ ?
জন্মদিনত কিং খানৰ অনুৰাগীয়ে লাভ কৰিব উপহাৰ
ছ’চিয়েল মিডিয়াত শ্বাহৰুখ খান আৰু তাপসী পান্নুৰ অভিনীত ছবি ডাংকি চৰ্চাত আছে ৷ সোমবাৰে নিশা ছ’চিয়েল মিডিয়াত #DunkiTeaser ট্ৰেণ্ড কৰিছে ।
দৰাচলতে ২ নৱেম্বৰত ছবিখনৰ টিজাৰ মুক্তি পাব বুলি জল্পনা-কল্পনা কৰা হৈছে । কিয়নো ২ নৱেম্বৰত শ্বাহৰুখ খানৰ জন্মদিন আৰু কোৱা হৈছে যে শ্বাহৰুখে নিজৰ অনুৰাগীক জন্মদিনৰ উপহাৰ হিচাপে ডাংকিৰ টিজাৰ মুকলি কৰিব ।