চিটাৰা ডেস্ক, 14 ফেব্ৰুৱাৰী : আয়ুষ্মান খুৰানা আৰু অনন্যা পাণ্ডে অভিনীত ড্ৰীম গাৰ্ল 2 ছবিখনৰ নিৰ্মাতাসকলে ভেলেণ্টাইন ডে’ৰ দিনটোত ছবিখনৰ টিজাৰটো মুকলি কৰে (Dream Girl 2 teaser)। টিজাৰটোত দেখিবলৈ পোৱা গৈছে এগৰাকী পূজা নামৰ মহিলাই পাঠানৰ পৰা এটা ফোন কল লাভ কৰে ৷ এই পূজাৰ চেহেৰাটো স্পষ্টকৈ দেখুওৱা হোৱা নাই টিজাৰটোত ৷ টিজাৰটোৰ সৈতে সম্পৰ্ক আছে পাঠানৰ ৷ কিন্তু ছবিখনৰ মুখ্য অভিনেত্ৰী অনন্যাই পছন্দ কৰা নাই পাঠান-পূজাৰ সম্পৰ্কটো ৷
সোমবাৰে আয়ুষ্মান খুৰানাই ইনষ্টাগ্ৰামত ড্ৰীম গাৰ্ল 2 ৰ টিজাৰ শ্বেয়াৰ কৰে (Ayushmann Khurrana Dream Girl 2 teaser) । টিজাৰটোত পূজা নামৰ এগৰাকী মহিলাক সাজি-কাচি থকা দেখা গৈছে, পূজাৰ মুখখন অৱশ্যে টিজাৰটোত প্ৰকাশ কৰা নাই ।কোন বাৰু পাঠানৰ সৈতে সম্পৰ্ক থকা এই পূজা ? হয় আপোনালোকে ঠিকেই ভাবিছে ৷ আয়ুষ্মানক এগৰাকী মহিলাৰ কণ্ঠ অনুকৰণ কৰিব পৰা পুৰুষ হিচাপে দেখুওৱা হৈছে টিজাৰটোত । ভিডিঅ’টোত আয়ুষ্মানে এছ আৰ কেৰ পাঠান চৰিত্ৰৰ সৈতে ফোনযোগে কথা পতা দেখা গৈছে ।
"হেল্ল' মে পূজা বোল ৰহি হু । আপ কৌন?" আয়ুষ্মানে এইদৰে সুধিলে । তেওঁক প্রত্যুত্তৰ দি ফোনটোৰ সিটো পাৰে থকা এজন ব্যক্তিয়ে ব্লকবাষ্টাৰ ছবি পাঠানৰ শ্বাহৰুখ খানৰ চৰিত্ৰৰ কথা উল্লেখ কৰি নিজকে পাঠান বুলি সম্বোধন কৰে । "পূজা...মে পাঠান", ফোন কৰাজনে ক'লে । "উফ...কেইছে হো মেৰে পাঠান", আয়ুষ্মানে লগতে সুধিলে । তেওঁক উত্তৰ দি ফোন সিটো পাৰৰ পৰা ঠাট্টা কৰি ক'লে, "পেহলে ছে ভি জ্যাদা অমিৰ...হেপি ভেলেণ্টাইন ডে’ পূজা" ৷