অনলাইন প্ৰৱঞ্চনাৰ বলি হ’ল অঞ্জলি, এই কৌশলৰে প্ৰৱঞ্চকে লুটি নিলে লাখ লাখ টকা

Anjali Patil: চাইবাৰ অপৰাধৰ বলি হ’ল ৰজনীকান্তৰ ‘কালা’, ‘মিৰ্জিয়া’ আৰু ‘নিউটন’ৰ দৰে ছবিত কাম কৰা অভিনেত্ৰী অঞ্জলি পাটিল ৷ হেৰুৱালে ৫.৭৯ লাখ টকা ৷ সবিশেষ জানক এই প্ৰতিবেদনত ৷

চিটাৰা ডেস্ক, ৩ জানুৱাৰী: দেশত দিনক দিনে বৃদ্ধি পাইছে চাইবাৰ অপৰাধৰ ঘটনা । কেৱল সাধাৰণ মানুহেই নহয়, চিনেমা জগতৰ বহু অভিনেতাসকলো ইয়াৰ বলি হৈছে । প্ৰৱঞ্চকে প্ৰতাৰণা কৰিবলৈ প্ৰতিদিনে ন ন কৌশল অৱলম্বন কৰিছে । শেহতীয়াকৈ সেনা বিষয়াৰ নাম লৈ এজন প্ৰৱঞ্চকে বলীউডৰ অভিনেতা ৰাকেশ বেদীৰ পৰা ৮৫ হাজাৰ টকাৰ প্ৰৱঞ্চনা কৰে । এই গোচৰ মাৰ নৌযাওঁতেই এতিয়া অনলাইন প্ৰৱঞ্চনাৰ বলি হ’ল অভিনেত্ৰী অঞ্জলি পাটিল ৷ ‘পাৰ্চেলত ড্ৰাগছ আছে’ বুলি কৈ অভিনেত্ৰীগৰাকীৰ পৰা প্ৰৱঞ্চকে লুটি নিলে লাখ লাখ টকা ৷

৫.৭৯ লাখ টকাৰ জালিয়াতি

সংবাদ মাধ্যমৰ বাতৰি অনুসৰি প্ৰৱঞ্চকটোৱে অভিনেত্ৰীগৰাকীৰ পাৰ্চেলত ড্ৰাগছ আছে বুলি কৈ ৫.৭৯ লাখ টকা প্ৰতাৰণা কৰে । কেৱল এয়াই নহয়, তিনিটা বেংক একাউণ্টত ধন সৰবৰাহৰ গোচৰতো অঞ্জলিক জড়িত কৰিছিল । খবৰ অনুসৰি, ২৮ ডিচেম্বৰত অভিনেত্ৰীগৰাকীলৈ অজ্ঞাত নম্বৰৰ পৰা এটা ফোন কল আহিছিল, যিয়ে নিজকে ফেডএক্স কুৰিয়ৰ কোম্পানীৰ কৰ্মচাৰী দীপক শৰ্মা বুলি পৰিচয় দিছিল । প্ৰৱঞ্চকটোৱে অঞ্জলিক কয় যে তেওঁৰ নামত টাইৱানলৈ যোৱা এটা পাৰ্চেলত ড্ৰাগছ পোৱা গৈছে, যাৰ বাবে পাৰ্চেলটো শুল্ক বিভাগে জব্দ কৰা বুলি কয় ।

আধাৰ কাৰ্ডৰ কপি উদ্ধাৰ হোৱা বুলি দাবী

ডি এন নগৰ থানাত দাখিল কৰা প্ৰতিবেদন অনুসৰি, পাৰ্চেলৰ ভিতৰত অভিনেত্ৰীগৰাকীৰ আধাৰ কাৰ্ডৰ কপি উদ্ধাৰ হোৱা বুলি দাবী কৰিছিল প্ৰৱঞ্চকটোৱে । আৰক্ষীৰ প্ৰতিবেদনত দাখিল কৰা এজাহাৰ অনুসৰি প্ৰৱঞ্চকটোৱে অভিনেত্ৰীগৰাকীক কয় যে তেওঁৰ আধাৰ কাৰ্ডৰ অপব্যৱহাৰ হৈছে । ইয়াৰ পিচত প্ৰৱঞ্চকটোৱে অভিনেত্ৰীগৰাকীক এই বিষয়ত মুম্বাইৰ অপৰাধ বিভাগৰ সৈতে কথা পাতিবলৈ পৰামৰ্শ দিয়ে ।

প্ৰৱঞ্চকটোৱে ফোন কল ৰখাৰ কিছু সময়ৰ পিচতে অঞ্জলিলৈ আহিল আন এজন ব্যক্তিৰ ফোন কল ৷ কল কৰা ব্যক্তিজনে নিজকে মুম্বাইৰ অপৰাধ বিভাগৰ এজন বিষয়া বেনাৰ্জী বুলি পৰিচয় দিছিল । তেওঁ অঞ্জলিৰ নাম ধন সৰবৰাহৰ গোচৰৰ সৈতে জড়িত আছে বুলি কয় । বেনাৰ্জীয়ে কয় যে তেওঁৰ আধাৰ কাৰ্ড ধন সৰবৰাহৰ গোচৰত জড়িত তিনিটা বেংক একাউণ্টৰ সৈতে জড়িত । ইয়াৰ পৰীক্ষণ প্ৰক্ৰিয়াৰ বাবে তেওঁ ৯৬,৫২৫ টকাৰ প্ৰচেছিং মাচুল বিচাৰিছিল । অঞ্জলিয়ে প্ৰৱঞ্চকৰ নম্বৰত অনলাইনৰ জৰিয়তে এই ধন পৰিশোধ কৰে ।

তদন্তৰ নামত ধন দাবী

ইয়াৰ পিচত প্ৰৱঞ্চকটোৱে কয় যে যিবোৰ একাউণ্টত তেওঁৰ আধাৰ কাৰ্ড ধন সৰবৰাহৰ বাবে ব্যৱহাৰ কৰা হৈছিল, সেইবোৰ একাউণ্টৰ বেংক বিষয়াসকল এই কেলেংকাৰীৰ সৈতে জড়িত হ’ব পাৰে, যাৰ তদন্তৰ বাবে প্ৰৱঞ্চকটোৱে অভিনেত্ৰীগৰাকীক ৪,৮৩,২৯১ টকা বিচাৰিছিল । ইফালে কোনো সংকোচ নকৰাকৈয়ে অঞ্জলিয়েও নিজৰ একাউণ্টৰ পৰা ধন প্ৰৱঞ্চকৰ পঞ্জাৱ নেচনেল বেংকৰ একাউণ্টলৈ পঠিয়াই দিয়ে ।

এই সন্দৰ্ভত তদন্ত অব্যাহত ৰাখিছে আৰক্ষীয়ে

ইয়াৰ পিচত অভিনেত্ৰীগৰাকীয়ে এই সমগ্ৰ ঘটনা নিজৰ ঘৰৰ মালিকক জনাইছিল, যিয়ে এই বিষয়ত প্ৰৱঞ্চনাৰ সন্দেহ কৰিছিল । ইয়াৰ পিচত অঞ্জলিয়েও উপলব্ধি কৰিলে যে তেওঁ প্ৰৱঞ্চনাৰ বলি হৈছে । ইয়াৰ পিচত অভিনেত্ৰীগৰাকীয়ে ২৯ ডিচেম্বৰত আৰক্ষীৰ থানাত গোচৰ ৰুজু কৰে । এই বিষয়ত আৰক্ষীয়ে প্ৰৱঞ্চনা আৰু অসৎ কাৰ্যৰ লগতে আই টি আইনৰ অধীনত দুজন অচিনাকি ব্যক্তিৰ বিৰুদ্ধে গোচৰ ৰুজু কৰিছে । বৰ্তমান গোচৰৰ তদন্ত চলি আছে ।

লগতে পঢ়ক:প্ৰৱঞ্চনাৰ বলি হ’ল এইগৰাকী জনপ্ৰিয় অভিনেতা