চিটাৰা ডেস্ক, ১৯ ছেপ্টেম্বৰ: সোমবাৰে কৰ্ণাটকৰ বেংগালুৰুত চলচ্চিত্ৰ নিৰ্মাতা বিবেক অগ্নিহোত্ৰীয়ে তেওঁৰ আগন্তুক ছবি দ্য ভেকচিন ৱাৰৰ বিশেষ প্ৰদৰ্শনীৰ আয়োজন কৰে । এই প্ৰদৰ্শনী অনুষ্ঠানত উল্লেখযোগ্য অতিথিসকলৰ ভিতৰত উপস্থিত থাকে প্ৰখ্যাত সমাজকৰ্মী তথা ইনফ’ছিছৰ সহ-প্ৰতিষ্ঠাপক সুধা মূৰ্তি ৷ এই অনুষ্ঠানত উপস্থিত থাকি সম্প্ৰতি ছ’চিয়েল মিডিয়াত চৰ্চা লাভ কৰিছে সুধা মূৰ্তিয়ে ।
বিবেক অগ্নিহোত্ৰীয়ে ছবিখনৰ সন্দৰ্ভত সুধা মূৰ্তিৰ সৈতে আলোচনাত মিলিত হৈ থকা এখন ফটো ছ’চিয়েল মিডিয়াত শ্বেয়াৰ কৰি প্ৰদৰ্শনীত সুধা মূৰ্তি উপস্থিত থকাৰ বাবে আনন্দ আৰু কৃতজ্ঞতা প্ৰকাশ কৰে । তেওঁ ফটোখনৰ কেপচনত লিখিছে, "#TheVaccineWar #ATrueStory প্ৰদৰ্শনত আপোনাৰ প্ৰেৰণাদায়ক কথাৰ বাবে ধন্যবাদ @smtsudhamurty ji।"
বিবেকে শ্বেয়াৰ কৰা এটা ভিডিঅ’ত পদ্মভূষণ লাভ কৰা সুধা মূৰ্তিয়ে দ্য ভেকচিন ৱাৰৰ প্ৰশংসাত পঞ্চমুখৰ হোৱা দেখা গৈছে ৷ সুধা মূৰ্তিয়ে ক’লে, "সাধাৰণ মানুহে বুজি নাপাব COVAXIN কি ! কিন্তু এই চিনেমাখনে স্পষ্টকৈ দেখুৱাইছে ইয়াৰ প্ৰচেষ্টা । ই কেৱল সাধাৰণ কাম নহয় । ই বিজ্ঞানীসকলে কৰা নিস্বাৰ্থ কাম । তেওঁলোকে এই কামত নিজৰ সৰ্বোচ্চ সময় কটালে যাতে আমি সকলোৱে গণতান্ত্ৰিক ভাৰত তথা সুস্থ ভাৰত চাব পাৰো ।’’ ভাষণৰ সামৰণিত সুধা মূৰ্তিয়ে কয়, "নৈতিক, কঠোৰ পৰিশ্ৰমী হওক আৰু ভাৰতীয় বুলি গৌৰৱ কৰক, ইণ্ডিয়ান বুলি গৌৰৱ কৰক ।"