চিটাৰা ডেস্ক, ২১ ডিচেম্বৰ:আজি বিশ্বজুৰি ছবিগৃহত মুকলি হ’ল শ্বাহৰুখ খানৰ এই বছৰটোৰ অন্তিম তথা তৃতীয়খন বহু প্ৰত্যাশিত ছবি ডাংকি ৷ ইফালে ছবিখনৰ মুক্তিৰ পূৰ্বে অৰ্থাৎ বুধবাৰে নিশা কিং খানে এক্স একাউন্টত AskSRK Session অনুষ্ঠিত কৰে ৷ এই চেছনত বহু অনুৰাগীয়ে ডাংকিৰ সন্দৰ্ভত কিং খানক বহু আমোদজনক প্ৰশ্ন সোধা পৰিলক্ষিত হয় ৷ এজন অনুৰাগীয়ে ডাংকিৰ প্ৰথম দিনৰ উপাৰ্জন আৰু অষ্ট্ৰেলিয়াৰ ক্ৰিকেটাৰ মিচেল ষ্টাৰ্কৰ নিলামৰ মূল্যৰ মাজত পাৰ্থক্য সন্দৰ্ভত এটা আমোদজনক প্ৰশ্ন কৰে ৷ এই প্ৰশ্নৰ উত্তৰত শ্বাহৰুখ খানে দিয়া হাস্যৰসিক উত্তৰে সম্প্ৰতি সকলোৰে দৃষ্টি আকৰ্ষণ কৰিছে ৷
এক্স একাউন্টত AskSRK Sessionত অনুৰাগীয়ে কিং খানক বহু প্ৰশ্ন কৰিছিল, যাৰ উত্তৰ শ্বাহৰুখে নিজৰ হাস্যৰসিক শৈলীৰে উত্তৰ দিছিল । এজন অনুৰাগীয়ে প্ৰশ্ন কৰে- ‘‘ডাংকিৰ প্ৰথম দিনাৰ উপাৰ্জন আৰু মিচেল ষ্টাৰ্কৰ নিলামৰ মূল্যৰ মাজত কিমান পাৰ্থক্য থাকিব ? ’’ এই প্ৰশ্নৰ উত্তৰত কিং খানে ক’লে, ‘‘এইটো কি প্ৰশ্ন হ’ল ভাতৃ ? সেইফালে ধন গৈছে, কিন্তু ডাংকিত ধন আহিব হে । হা হা ।’’
উল্লেখ্য যে, অষ্ট্ৰেলিয়াৰ বেগী বলাৰ মিচেল ষ্টাৰ্ক কলকাতা নাইট ৰাইডাৰ্ছে (কে কে আৰ) ২৪.৭৫ কোটি টকাত ক্ৰয় কৰিছিল, ইয়াৰ মাত্ৰ কেইঘণ্টামানৰ পিচতে তেওঁলোকৰ অধিনায়ক পেট কামিন্সক ছানৰাইজাৰ্ছ হায়দৰাবাদে (এছ আৰ এইচ) ২০ কোটি টকাত ক্ৰয় কৰে ৷ ইয়াৰ লগে লগে মঙলবাৰে ডুবাইত অনুষ্ঠিত হোৱা নিলামত মিচেল ষ্টাৰ ইণ্ডিয়ান প্ৰিমিয়াৰ লীগৰ ইতিহাসৰ আটাইতকৈ দামী খেলুৱৈ হিচাপে পৰিগণিত হয়।
ইফালে আন এজন অনুৰাগীয়ে কিং খানক সোধে- ‘‘ছাৰ পাঠান, আজাদ, বিক্ৰম ৰাথোৰ নে হাৰ্ডি, এই বছৰৰ আপোনাৰ প্ৰিয় চৰিত্ৰ কোনটো ?’’ ছুপাৰষ্টাৰগৰাকীয়ে কয়, ‘‘মোৰ প্ৰিয় চৰিত্ৰটো হ’ল দৰ্শকে ভাল পোৱা চৰিত্ৰটো । গতিকে আশাকৰোঁ আপোনালোকে হাৰ্ডিকো আন সকলোৰে চৰিত্ৰৰ দৰেই ভাল পাব । তেওঁ এজন সৎ লোক । এজন সেনা বিষয়া আৰু এজন প্ৰেমিক ।’’