চিটাৰা ডেস্ক, 13 অক্টোবৰ: ছবিয়েই হওক বা বাস্তৱ জীৱনৰ কোনো বিশেষ উৎসৱেই হওক, বেছিভাগ বিশেষ মুহূৰ্তত প্ৰয়োজন হয় সংগীতৰ । সংগীতে সকলোৰে মাজত বৃদ্ধি কৰে উৎসাহ ৷ বিশেষকৈ বিশ্বকাপত ভাৰত-পাকিস্তানৰ দৰে বিশেষ মুহূৰ্তত সংগীতৰ গুৰুত্ব আৰু অধিক বৃদ্ধি পায় । সংগীতৰ কথা আহিলে কণ্ঠশিল্পী অৰিজিৎ সিঙৰ কথা কেনেকৈ নো নাহিব, অৰিজিতৰ সুমধুৰ কণ্ঠত মন্ত্ৰমুগ্ধ হৈ পৰে অনুৰাগী । গতিকে ক্ৰিকেট প্ৰেমীসকল সাজু হওক, কাৰণ এইবাৰ ভাৰত বনাম পাকিস্তানৰ মেচখনৰ আৰম্ভ হোৱাৰ পূৰ্বে অৰিজিত সিঙে নিজৰ সংগীতেৰে সকলোৰে মনোবল বৃদ্ধি কৰিবলৈ আহিব ।
ভাৰতীয় ক্ৰিকেট নিয়ন্ত্ৰণ ব’ৰ্ডে এক্স (পূৰ্বৰ টুইটাৰ)ত ঘোষণা কৰিছে যে ১৪ অক্টোবৰত আহমেদাবাদৰ নৰেন্দ্ৰ মোদী ষ্টেডিয়ামত প্ৰি-মেচৰ শ্ব’ৰ সময়ত অৰিজিত সিং, শংকৰ মহাদেৱন আৰু সুখৱিন্দৰ সিঙে সংগীত পৰিৱেশন কৰিব । পোষ্টটোত লিখা আছিল, ‘‘এক বিশেষ প্ৰদৰ্শনেৰে আৰম্ভ হ’ব INDvsPAK ৰ প্ৰতিযোগিতা । বিশ্বৰ সৰ্ববৃহৎ ক্ৰিকেট খেলপথাৰ - নৰেন্দ্ৰ মোদী ষ্টেডিয়ামত অৰিজিৎ সিঙৰ মন্ত্ৰমুগ্ধ কৰা বিশেষ মিউজিকেলৰ বাবে সাজু হওক । ১৪ অক্টোবৰৰ দুপৰীয়া ১২:৩০ বজাৰ পৰা আৰম্ভ হ’বলগীয়া প্ৰি-মেচ শ্ব’ত যোগদান কৰক ।’’
আন এটা পোষ্টত শংকৰ মহাদেৱনৰ বিষয়ে তথ্য দি বিচিচিআইয়ে লিখিছে, ‘‘আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’বলগীয়া ডাঙৰ খেলখনৰ পূৰ্বে শংকৰ মহাদেৱনক লাইভত চাওক । ১৪ অক্টোবৰত দিনৰ ১২:৩০ বজাৰ পৰা বিশ্বৰ সৰ্ববৃহৎ ক্ৰিকেট খেলপথাৰত প্ৰি-মেচ শ্ব’ৰ অভিজ্ঞতা লাভ কৰক ।’’ একেদৰে বিচিচিআইয়ে পাঞ্জাবী কণ্ঠশিল্পী সুখৱিন্দৰ সিঙৰ প্ৰি-মেচৰ বিষয়েও তথ্য দিছে ।