চিটাৰা ডেস্ক, 24 জুলাই: যিমানেই মানুহ ডিজিটেল হৈছে সিমাই চাইবাৰ অপৰাধীৰ সংখ্যাও বৃদ্ধি পাইছে ৷ এই চাইবাৰ অপৰাধীয়ে কেৱল সাধাৰণ লোককেই নহয়, অভিনেতা-অভিনেত্ৰীসকলকো লক্ষ্য কৰি লৈছে ৷ বৰ্তমান অনলাইনৰ যুগ ৷ সেয়াহে আমি ঘৰত বহিয়ে যিকোনো বস্তু অতি সহজে অৰ্ডাৰ কৰিব পাৰো ৷ কিন্তু অনলাইনত যিকোনো বস্তু অৰ্ডাৰ কৰাৰ সময়ত আপুনি অলপ সাৱধান হ’ব লাগিব, অন্যথা মিনিটতে খালী হ’ব পাৰে আপোনাৰ বেংক একাউন্ট ৷ এইবাৰ এনে এক চাইবাৰ অপৰাধৰ কবলত পৰিছে এগৰাকী অভিনেত্ৰী ৷
এই অপৰাধৰ বলি হৈছে টিভি ধাৰাবাহিক ‘সাথ নিভানা সাথিয়া’ত অভিনয় কৰা অভিনেত্ৰী আকাংক্ষা জুনেজা । আকাংক্ষক শেহতীয়াকৈ দেখা পোৱা গৈছিল ‘সাথ নিভানা সাথিয়া’ ধাৰাবাহিকত আৰু এতিয়া ‘কুণ্ডলী ভাগ্য’ ধাৰাবাহিকত । শেহতীয়াকৈ অভিনেত্ৰীগৰাকীয়ে খাদ্যৰ অৰ্ডাৰ দিবলৈ গৈ বলি হ’ল প্ৰৱঞ্চনাৰ ৷ অপৰাধীয়ে মিনিটতে লুটি নিলে ৩০ হাজাৰ টকা । অৱশ্যে অভিনেত্ৰীগৰাকীয়ে সতৰ্কতা অৱলম্বন কৰি ততাতৈয়াকৈ বেংকত যোগাযোগ কৰি একাউণ্ট ব্লক কৰি দিয়ে।
খাদ্য অৰ্ডাৰৰ জালিয়াতি
অভিনেত্ৰীগৰাকীয়ে কয়, ‘‘শেহতীয়াকৈ মই বাহিৰৰ পৰা খাদ্যৰ অৰ্ডাৰ দিছিলো, তাৰ পিচত কোম্পানীটোৰ পৰা মোলৈ ফোন আহিছিল । তেওঁলোকে মোক কৈছিল যে, আপোনালৈ এটা লিংক পঠিওৱা হৈছে, সেই লিংকটোত ক্লিক কৰি আপোনাৰ অৰ্ডাৰ নিশ্চিত কৰক । যেতিয়া মই সুধিলোঁ যে এনেকুৱা নিয়ম আগত নাছিলে । তেতিয়া তেওঁ ক’লে, এয়া নতুন প্ৰট’কল । লিংকটোত ক্লিক কৰাৰ লগে লগে মোৰ একাউণ্টৰ পৰা ৫ মিনিটৰ মূৰে মূৰে ১০ হাজাৰ টকা কৰ্তন হ’বলৈ ধৰিলে ।’’