2023 চনৰ সফলতাৰ পিচত 2024 চনত কিদৰে সাজু হৈছে কিং খান ?

অভিনেতা শ্বাহৰুখ খানৰ বাবে ২০২৩ চনটো এটা ব্যস্ত বছৰ হিচাপে পৰিগণিত হ’ল ৷ তেওঁৰ হিট ছবি পাঠান, জোৱান আৰু ডাংকিয়ে উদ্যোগটোত ঢৌ তুলিবলৈ সক্ষম হয় । চলিত বছৰটোত অভিনেতাজনে তিনিখন চলচ্চিত্ৰৰ বাবে তেওঁৰ পৰিকল্পনা প্ৰকাশ কৰিব বুলি জনা গৈছে ।

চিটাৰা ডেস্ক, 17 জানুৱাৰী :২০২৩ চনটো বলীউডৰ ছুপাৰষ্টাৰ শ্বাহৰুখ খানৰ বাবে অতি গুৰুত্বপূৰ্ণ বুলি প্ৰমাণিত হয়, কিয়নো তেওঁৰ প্ৰতিখন ছবিয়েই বক্স অফিচত সফল হয় । সিদ্ধাৰ্থ আনন্দৰ পাঠানৰ পৰা আৰম্ভ কৰি এটলীৰ জোৱান আৰু তাৰ পিছত ৰাজকুমাৰ হিৰাণীৰ ডাংকিলৈকে ২০২৩ চনত প্ৰতিভাৱান অভিনেতাগৰাকীয়ে নিজৰ অভিনয়ৰ যাদুৰে সকলোকে মুগ্ধ কৰি ৰাখে ৷ এতিয়া বাতৰি অনুসৰি কিং খানে এই জানুৱাৰী মাহৰ শেষৰ ফালে নিজৰ পৰৱৰ্তী প্ৰকল্প ঘোষণা কৰাৰ সম্ভাৱনা আছে ৷

সূত্ৰৰ পৰা জানিব পৰা গৈছে যে, অভিনেতাগৰাকীয়ে নিজৰ কঠোৰ পৰিশ্ৰমৰ ফলাফল লাভ কৰি আনন্দিত হৈ পৰিছে, কিয়নো তেওঁৰ ছবিসমূহে বক্স অফিচত যথেষ্ট প্ৰভাৱ পেলাইছে । নৱবৰ্ষ উদযাপনৰ বাবে শ্বাহৰুখ খান পৰিয়ালৰ সৈতে সময় কটাবলৈ লণ্ডনলৈ ৰাওনা হয় । তদুপৰি আভিনেতাজনৰ ঘনিষ্ঠ লোকে দাবী কৰিছে যে, ৫৮ বছৰীয়া অভিনেতাগৰাকীয়ে এই মাহত তিনিটা নতুন প্ৰজেক্ট ঘোষণা কৰাৰ সম্ভাৱনা আছে ।

উদ্যোগটোত শ্বাহৰুখ খানৰ ভৱিষ্যতৰ প্ৰজেক্টক লৈ প্ৰত্যাশা আৰু কৌতুহল সকলোৰে মাজত জাগি উঠিছে ৷ অৱশ্যে সূত্ৰটোৱে প্ৰকাশ কৰিছে যে শ্বাহৰুখ খানে কোনো প্ৰকল্পত স্বাক্ষৰ কৰিবলৈ খৰখেদা কৰা নাই৷ হাতত বিভিন্ন চিত্ৰনাট্যৰ স্ক্ৰীপ্ট লৈ তেওঁ বিৰতিৰ পৰা উভতি আহি স্ক্ৰীপ্টবোৰ নিখুঁতভাৱে পঢ়াৰ পৰিকল্পনা কৰিছে । তাৰ পিচতহে তেওঁ নিজৰ পৰৱৰ্তী পদক্ষেপৰ সিদ্ধান্ত ল’ব, এই কথা সূত্ৰই উল্লেখ কৰিছে ।

সূত্ৰ অনুসৰি, এয়া নিশ্চিত যে শ্বাহৰুখ খানে 2024 চনৰ প্ৰাৰম্ভিক মাহত তিনিখন চলচ্চিত্ৰৰ বাবে তেওঁৰ পৰিকল্পনা প্ৰকাশ কৰিব আৰু পৰৱৰ্তী সময়ত তেওঁলোকৰ প্ৰযোজনা আৰম্ভ কৰিব । সূত্ৰটোৱে লগতে উল্লেখ কৰিছিল যে, অভিনেতাজনে তেওঁৰ দৰ্শকসকলক আচৰিত কৰাৰ লক্ষ্যৰে তেওঁ অভিনয়ৰ নতুন শৈলীবোৰ এতিয়াই মুকলিকৈ প্ৰকাশ নকৰে ৷

লগতে পঢ়ক :এখন প্ৰি-ৱেডিং ফটোৰ বাবেই ট্ৰ’ল হ’ল আইৰা খান