পৰিৱৰ্তন বিচাৰি ৰাইজে ভোট দিছেঃ ৰিপুন বৰা

তৃতীয় তথা অন্তিম পৰ্যায়ৰ নিৰ্বাচন সুকলমে অনুষ্ঠিত হৈ যোৱাৰ পৰৱৰ্তী সময়ত ৰাজীৱ ভৱনত সংবাদমেলৰ আয়োজন প্ৰদেশ কংগ্ৰেছৰ সভাপতিৰ

গুৱাহাটী, 24 এপ্ৰিলঃলোকসভা নিৰ্বাচন অন্ত পৰাৰ পাচত বুধবাৰে ৰাজীৱ ভৱনত সংবাদমেলযোগে ৰাইজক ধন্যবাদ জ্ঞাপন কৰে প্ৰদেশ কংগ্ৰেছৰ সভাপতি ৰিপুন বৰাই ৷ ৰিপুন বৰাৰ সৈতে সংবাদমেলত উপস্থিত থাকে গুৱাহাটী লোকসভা সমষ্টিৰ প্ৰাৰ্থী ববিতা শৰ্মা আৰু প্ৰদেশ কংগ্ৰেছৰ মুখপাত্ৰ অপূৰ্ব ভট্টাচাৰ্য ৷

সংবাদ মেলত অসমৰ ৰাইজক ধন্যবাদ জ্ঞাপন কৰি ৰিপুন বৰাই কয় যে, "অসমৰ ৰাইজে পৰিৱৰ্তন বিচাৰি এইদৰে ব্যাপক হাৰে ওলাই আহিছে ৷ সেইবাবে আমি দলৰ হৈ অসমবাসীক ধন্যবাদ জ্ঞাপন কৰিছো৷ ৰাইজে নৰেন্দ্ৰ মোডী নেতৃত্বাধীন বিজেপি চৰকাৰৰ পৰিৱৰ্তন বিছাৰিছে ৷ কংগ্ৰেছৰ প্ৰতি ৰাইজে সঁহাৰি জনাই নিজৰ ভোটাধিকাৰ সাব্যস্ত কৰিছে ৷ হিমন্ত বিশ্ব শৰ্মা এগৰাকী হতাশগ্ৰস্ত মানুহ ৷ বিজেপিৰ স্থিতি দেখি হতাশাত ভুগি য'তে-ত'তে উদ্ভট নৃত্য প্ৰদৰ্শন কৰিছে ৷ নিৰ্বাচন আয়োগে বিজেপিৰ হৈ কাম কৰিছে, নিৰ্বাচন আয়োগৰ সকলো বিষয়া-কৰ্মচাৰীয়ে বিজেপিৰ হৈয়েই কাম কৰিছে ৷ পশ্চিমবংগত অমিত শ্বাহে কৰা মন্তব্য সম্পূৰ্ণ অসাংবিধানিক ৷ উচ্চতম ন্যায়ালয়ে নিৰীক্ষণ কৰি থকা ৰাষ্ট্ৰীয় নাগৰিকপঞ্জীক লৈ তেওঁৰ মন্তব্য সম্পূৰ্ণ অসাংবিধানিক ৷ আদালত অৱমাননাৰ বাবেই শীঘ্ৰেই উচ্চতম ন্যায়ালয়ে শাসনাধীষ্ঠিত দলটোৰ সভাপতিৰ বিৰুদ্ধে বিহীত ব্যৱস্থা গ্ৰহণ কৰিব লাগে ৷"

তেওঁ লগতে উল্লেখ কৰে যে, অসমৰ 14খন আসনৰ 10 খনেই কংগ্ৰেছে লাভ কৰিব আৰু গুৱাহাটী লোকসভা সমষ্টিৰ ৰাইজে কংগ্ৰেছ দলৰ পক্ষত ভোটদান কৰিছে ৷