নগাঁও,22 জুন: সমগ্ৰ ৰাজ্যতেই অপৰাধমূলক কাৰ্যৰ বিৰুদ্ধে তীব্ৰ অভিযান অব্যাহত ৰাখিছে অসম আৰক্ষী (ASSAM POLICE)য়ে ৷ আৰক্ষীৰ অভিযানত ইতিমধ্যে ৰাজ্যত কোটি কোটি টকাৰ ড্ৰাগছ (Drugs Seized) জব্দ কৰাৰ লগতে আটক হৈছে বহু ড্ৰাগছ মাফিয়া ৷ সমান্তৰালকৈ নগাঁও জিলাতো আৰক্ষী অধীক্ষক আনন্দ মিশ্ৰই চলাই গৈছে ইটোৰ পিছত সিটো অভিযান ৷ আৰক্ষীৰ অভিযানত জিলাখনৰ বিভিন্ন প্ৰান্তৰ পৰা ইতিমধ্যে ড্ৰাগছ মাফিয়া, অবৈধ সুৰা সৰবৰাহকাৰীৰ গ্ৰেপ্তাৰ কৰাৰ লগতে উচ্ছেদ কৰিছে বহু অবৈধ চুলাই মদৰ ঘাটি ৷
সমান্তৰালকৈ নগাঁও জিলা (Nagaon District)ৰ পুৰণিগুদাম চলচলিট সোমবাৰে আৰক্ষীয়ে চলোৱা এটা অভিযানত পুনৰ আন দুজন ভুৱা আৰক্ষী (Fake Police) গ্ৰেপ্তাৰ কৰে ৷ ধৃতলোক কেইজন হৈছে বঢ়মপুৰ আদৰ্শ গাঁৱৰ ৰাজীৱ বৰদলৈ আৰু চলচলি মুছলিম গাঁৱৰ ইবটিছাম আহমেদ ৷ সম্পৰ্কত ধৃত দুয়ো পতি-পত্নী বুলি জানিব পৰা গৈছে ৷ ধৃত ৰাজীৱ বৰদলৈ আৰু ইবটিছাম আহমেদে নগাঁও আৰক্ষী অধীক্ষকৰ কাৰ্যালয়ৰ বিশেষ শাখাত কৰ্মৰত বুলি পৰিচয় দি দীৰ্ঘ দিনৰে পৰা জিলা খনত বহু লোকক প্ৰৱঞ্চনা কৰি লুটি আহিছিল ধন ৷