চালকক প্ৰহাৰ কৰি দুৰ্বৃত্তই লুটিলে নিলে ধন

নলবাৰীৰ ঘগ্ৰাপাৰত দহ-বাৰজনীয় দুৰ্বৃত্তৰ দলে লুটিলে ব্ৰইলাৰ (Broilar) মুৰ্গী কঢ়িওৱা বাহনৰ চালকক ৷ দৃৰ্বৃত্তৰ প্ৰহাৰত গুৰুতৰভাৱে আহত বাহনখনৰ চালক আৰু হেণ্ডিমেন ৷

নলবাৰী, 6 আগষ্ট : নলবাৰীৰ বগলছ ৰোড (Bagals Road)ত শুকুৰবাৰে পুৱাই সংঘটিত হৈছে এটা চাঞ্চল্যকৰ ঘটনা ৷ এখন বলেৰো পিকআপ ভানৰ পৰা দুৰ্বৃত্তই লুটিলে নিয়ে অৰ্ধ লক্ষাধিক টকা ৷ অৰুণাচলত ব্ৰইলাৰ মুৰ্গী বিক্ৰী কৰি ওভতি অহাৰ সময়তে সংঘটিত হয় এই ঘটনাটো ৷ বাহনখনৰ চালকজনে সদৰি কৰামতে, অৰুণাচল (Arunachal)ৰ পৰা ওভতি অহাৰ সময়তে দুৰ্বৃত্তৰ এটা দলে হাতে হাতে চোকা অস্ত্ৰলৈ তেওঁলোকক আগভেটি ধৰে ৷

ইফালে চালক আৰু হেণ্ডিমেন গৰাকীক প্ৰাণে মৰাৰ ভাবুকি দি ঘগ্ৰাপাৰৰ পৰা অপহৰণ কৰি লৈ আহে ডকাইতৰ দলটোৱে ৷ বগলচ ৰোডত লুটপাত চলাই দুৰ্বৃত্তৰ দলটোৱে চালকজনৰ পৰা 60,000 (ষাঠি হাজাৰ) টকাসহ দুটা মোবাইল ফোন, এখন এ.টি.এম কাৰ্ড (ATM Card) আৰু গাড়ীখনৰ চাবি লৈ উধাও হয় ৷

লগতে পঢ়ক - অসংযত অৱস্থাত মুছলপুৰত দুগৰাকী যুৱতীসহ দুজন যুৱক

অকল সেয়াই নহয়, বাহনখনৰ চালক আৰু হেণ্ডিমেন জনক চোকা অস্ত্ৰৰে প্ৰহাৰ কৰি পলায়ণ কৰে দুৰ্বৃত্তৰ দলটো ৷ এই আক্ৰমণত চালক ইদ্ৰিছ খান গুৰুতৰভাৱে আহত হয় ৷

প্ৰায় দহ-বাৰজনীয় দুৰ্বৃত্তৰ দলটিয়ে এখন ব'লেৰো আৰু দুখন পিকআপ ভেন লৈ আহিছিল বুলি সাংবাদিকৰ আগত সদৰি কৰে চালকগৰাকীয়ে ৷ উক্ত ঘটনাটো সন্দৰ্ভত ততালিকে ঘগ্ৰাপাৰ আৰক্ষীক অৱগত কৰে বাহনখনৰ চালকে ৷ ঘটনাস্থলীত ঘগ্ৰাপাৰ আৰক্ষী (Ghagrapar Police) উপস্থিত হৈ বাহনখন চমজি লোৱাৰ লগতে আহত চালকজনৰ চিকিৎসাৰ ব্যৱস্থা কৰে ৷

উক্ত ঘটনাটো সন্দৰ্ভত আৰক্ষীয়ে তদন্ত অব্যাহত ৰাখিছে যদিও এতিয়ালৈ দুৰ্বৃত্তৰ সন্ধান লাভ কৰিবলৈ সক্ষম হোৱা নাই ৷

লগতে পঢ়ক - নলবাৰীত দিন-দুপৰতে চিলনী চোৰে লুটিলে টকাৰ বেগ