ধুবুৰী, 5 নৱেম্বৰ : কালীপূজাৰ নিশা ধুবুৰী চহৰৰ ঘোষ পাৰা অঞ্চলত চুমকি দত্ত নামৰ এগৰাকী মহিলাৰ ৰহস্যজনক মৃত্যুৰ ঘটনাই সৃষ্টি কৰিছে চাঞ্চল্যৰ । প্ৰতিবেশীয়ে সদৰি কৰা তথ্য অনুসৰি নিশা স্বামী স্ত্ৰীয়ে ঘৰৰ সন্মুখত ফটকা ফুটাই আনন্দ উপভোগ কৰিয়েই আছিল প্ৰতিবেশীৰ সৈতে । তাৰ পিছতেই হঠাৎ নিশা প্ৰায় এঘাৰ মান বজাত অচেতন অৱস্থাত মহিলা গৰাকীক ধুবুৰী অসামৰিক চিকিৎসালয়ত ভৰ্তি কৰায় স্বামী পৰিয়ালে । চিকিৎসালয়ত ভৰ্তি কৰাৰ পিছতেই চিকিৎসকে মৃত ঘোষণা কৰে মহিলা গৰাকীক ।
ফটকা ফুটাই আনন্দ কৰি থকাৰ পিছতে হঠাতে কেনেকৈ মৃত্যু হ’ল মহিলাৰ ?
ইপিনে মহিলা গৰাকীৰ মৃত্যুৰ খবৰ পাই মাজ নিশা চিকিৎসালয়ত উপস্থিত হয় মহিলা গৰাকীৰ পিতৃ পৰিয়ালৰ লোক । পিতৃ পৰিয়ালে লগে লগে গুৰুতৰ অভিযোগ উত্থাপন কৰি কয় যে, যৌতুক হিচাপে সোণৰ গহনা আদায় নিদিয়াৰ বাবেই প্ৰায়েই স্বামী অভিলাষ ঘোষে নিজৰ মাতৃৰ সৈতে মিলি মাৰপিট কৰি আহিছিল পত্নী চুমকি দত্তক ।