নগাঁৱত পুনৰ নকল সোণৰ বিস্কুটসহ দুজন আটক

নগাওঁ আৰক্ষীয়ে শেহতীয়াকৈ নিদ্ৰা হৰিছে অপৰাধীৰ । পুনৰ নকল সোণৰ বিস্কুটসহ দুই সৰবৰাহকাৰীক আটক কৰে আৰক্ষীয়ে।

নগাঁও, 16 জুন : ৰাজ্যজুৰি ড্ৰাগছ (DRUGS) তথা অপৰাধজনিত ঘটনাৰ বিৰুদ্ধে তীব্ৰ অভিযান অব্যাহত ৰাখিছে অসম আৰক্ষীয়ে ( ASSAM POLICE) ৷ আৰক্ষীৰ অভিযানত ইতিমধ্যে কোটি কোটি টকাৰ ড্ৰাগছ জব্দ কৰাৰ লগতে আৰক্ষীৰ জালত পৰিছে বহু ড্ৰাগছ সৰবৰাহকাৰী ৷ সমান্তৰালকৈ নগাঁও আৰক্ষী অধীক্ষক আনন্দ মিশ্ৰ (Anand Mishra) ই নগাঁও জিলাত অভিযান চলাই বহুকেইটা ড্ৰাগছ সৰবৰাহকাৰীক আটক কৰাৰ লগতে কেইবালাখ টকাৰ ড্ৰাগছ তথা নিচা জাতীয় সামগ্ৰী জব্দ কৰিবলৈ সক্ষম হৈছে ৷

সমান্তৰালকৈ, বুধবাৰে লাভ কৰা এটা গোপন সূত্ৰৰ পম খেদি নগাঁও আৰক্ষীৰ উপ আৰক্ষী অধীক্ষক (DSP) দিপ্তী মালীৰ নেতৃত্বত বৰগাওঁ আৰক্ষী (Bargaon Police)ৰ এটা দলে অভিযান চলায় ৷ আৰক্ষীৰ অভিযানত নগাঁৱৰ কাৱৈমাৰিৰ পৰা নকল সোণৰ বিস্কুটসহ দুজন সৰৰবৰাহকাৰীক আটক কৰিবলৈ সক্ষম হয়।

আটকাধীন সৰবৰাহকাৰীকেইটা ক্ৰমে খাইৰুল ইছমাল, জালাল উদ্দিন বুলি জানিব পৰা গৈছে । দুয়োজনৰে ঘৰ নগাঁৱৰ কাৱৈমাৰিত । আৰক্ষীৰ জেৰাত নকল সোণখিনি লক্ষিমপুৰ জিলাৰ পৰা আনিছিল বুলি স্বীকাৰ কৰিছে । ধৃত দুয়োজনে প্ৰলোভনেৰে দীৰ্ঘদিনৰ পৰা সোণ বিক্ৰীৰ নামত প্ৰৱঞ্চনা কৰি আহিছে বুলি আৰক্ষীৰ সূত্ৰত প্ৰকাশ । ইতিমধ্যে অধিক তথ্যৰ বাবে তদন্ত অব্যাহত ৰাখিছে আৰক্ষীয়ে ৷

লগতে পঢ়ক-মৰিগাঁৱত উৎকোচ লৈ ৰঙাঘৰত সোমাল কোষাগাৰৰ কৰ্মচাৰী