বৰপেটাত বাইকসহ চোৰৰ দল আটক

বৰপেটাৰোডত আৰক্ষীৰ জালত 6 জন বাইক চোৰ ৷ ধৃত চোৰ কেইটাৰ পৰা জব্দ চাৰিখনকৈ চুৰি বাইক ৷

বৰপেটাৰোড, 8 জুলাই : ক'ভিডে সৃষ্টি কৰা ভয়ংকৰ পৰিৱেশৰ মাজতো ৰাজ্যৰ বিভিন্ন প্ৰান্তত সংঘটিত হৈ আহিছে বিভিন্ন অপৰাধজনিত ঘটনা ৷ ইয়াৰ বিপৰীতে তীব্ৰৰ পৰা তীব্ৰতৰ অভিযান অব্যাহত ৰাখিছে অসম আৰক্ষীয়ে ৷ সমান্তৰালকৈ বৰপেটা জিলাতো বহু অপৰাধমূলক ঘটনা সংঘটিত হোৱাৰ বাতৰি বিভিন্ন সংবাদ মাধ্যমত প্ৰকাশ পাইছে ৷ তেনে এক অনুৰূপ ঘটনা সংঘটিত কৰা 6 টা চোৰ বুধবাৰে বৰপেটা আৰক্ষীৰ জালত পৰিছে ৷

উল্লেখ্য যে, দীৰ্ঘদিন ধৰি বৰপেটা চহৰত সঘনাই বাইক চুৰিৰ ঘটনা সংঘটিত হৈ আহিছিল ৷ ফলত বৰপেটা আৰক্ষীয়ে অব্যাহত ৰাখিছিল অভিযান ৷ এক গোপন সূত্ৰৰ পম খেদি বুধবাৰে বৰপেটাৰোড আৰক্ষীয়ে এক অভিযান চলায় ৷ আৰক্ষীৰ অভিযানত ৬ টা বাইক চোৰসহ চাৰিখন চুৰি হোৱা বাইক জব্দ কৰিবলৈ সক্ষম হয় আৰক্ষীয়ে ৷

আৰক্ষীয়ে আটক কৰা বাইক চোৰকেইটাৰ নাম হৈছে ইলিয়াছ আলী, জছৰ আলী, মণিৰুল শ্বেখ, খুৰশ্বিদ আলম, ৰফিকুল ইছলাম আৰু মইনুল হক ৷ এই 5 টা বাইক চোৰৰ ঘৰ চিৰাং জিলাত ৷ আনহাতে, ধৃত মইনুল হকৰ ঘৰ বঙাইগাঁৱত ৷

উল্লেখ্য যে, বৰপেটাৰোড আৰক্ষী থানাত বাইক চুৰি সংক্ৰান্তত 339/21 নম্বৰত পঞ্জীভূত হৈ আছিল এটা গোচৰ ৷ উক্ত গোচৰৰ ভিত্তিত বৰপেটাৰোড আৰক্ষী থানাৰ ভাৰপ্ৰাপ্ত আৰক্ষী বিষয়া চন্দন গোস্বামীৰ নেতৃত্বত যোৱা ৩০ জুনৰ পৰা ৬ জুলাইলৈকে অভিযান অব্যাহত ৰাখিছিল আৰক্ষীয়ে ৷ আৰক্ষীৰ অভিযানত ছয়টাকৈ বাইক চোৰক কৰায়ত্ত কৰিবলৈ সক্ষম হয় ৷ ইতিমধ্যে ধৃত চোৰ কেইটাক বৰপেটাৰোড আৰক্ষীয়ে আদালতলৈ প্ৰেৰণ কৰা বুলি জানিব পৰা গৈছে ৷

বৰপেটাৰোড আৰক্ষীয়ে জানিবলৈ দিয়া মতে, যিসকল লোকে চুৰি বাইক ক্ৰয় কৰিছে, সেইসকল লোকক বাইকসমূহ অনতিপলমে আৰক্ষী থানাত চমজাই দিবলৈ আহ্বান জনাইছে ৷ অন্যথা চুৰি বাইক ক্ৰয় কৰা লোকৰ বিৰুদ্ধেও আৰক্ষীয়ে কঠোৰ স্থিতি গ্ৰহণ কৰিব ৷ সম্প্ৰতি এই বিষয়ত আৰক্ষীৰ তদন্ত অব্যাহত আছে ৷

লগতে পঢ়ক- কৃষিক সামগ্ৰীৰ মূল্যবৃদ্ধিৰে কৃষকৰ ওপৰত মাধমাৰ