তিনিচুকীয়াৰ ৰাজ্যিক শিশু বিজ্ঞান সমাৰোহত মুখ্যমন্ত্ৰী

চাৰিদিনীয়া কাৰ্যসূচীৰে তিনিচুকীয়াৰ ৰঙাজানস্থিত জৱাহৰ নবোদয় বিদ্যালয়ত অনুষ্ঠিত হৈছে 27 সংখ্যক ৰাজ্যিক শিশু বিজ্ঞান সমাৰোহ ৷

তিনিচুকীয়া, 2 নৱেম্বৰ: অসম চৰকাৰৰ বিজ্ঞান আৰু তথ্য প্ৰযুক্তি বিভাগৰ সৌজন্যত তিনিচুকীয়া চহৰৰ ৰঙাজানস্থিত জৱাহৰ নবোদয় বিদ্যালয় চৌহদত যোৱা 1 নৱেম্বৰৰ পৰা 4 নৱেম্বৰলৈ চাৰিদিনীয়া কাৰ্যসূচীৰে অনুষ্ঠিত হৈ থকা 27 সংখ্যক ৰাজ্যিক শিশু বিজ্ঞান সমাৰোহৰ তৃতীয় দিনা সমাৰোহস্থলীত উপস্থিত হয় মুখ্যমন্ত্ৰী সৰ্বানন্দ সোণোৱাল ৷ সমাৰোহৰ তৃতীয় দিনৰ কাৰ্যসূচীত মুখ্য অতিথি হিচাপে অংশগ্ৰহণ কৰি মুখ্যমন্ত্ৰী গৰাকীয়ে ভাষণ প্ৰদান কৰি শিশু বিজ্ঞানী সকলক উৎসাহিত কৰে ৷

নিজ ভাষণত মুখ্যমন্ত্ৰীয়ে শিশু বিজ্ঞান সমাৰোহত ছাত্ৰ-ছাত্ৰীৰ ব্যাপক অংশগ্ৰহণৰ শলাগ লোৱাৰ লগতে ছাত্ৰৰ সমান্তৰাল ভাৱে অধিক হাৰত ছাত্ৰীৰো সমাৰোহত অংশগ্ৰহণক এক উল্লেখনীয় ঘটনা বুলি মন্তব্য কৰে ৷ অনুষ্ঠানত মুখ্যমন্ত্ৰীয়ে ছাত্ৰ-ছাত্ৰী সকলক পৰিৱেশ সংৰক্ষণৰ প্ৰতি সজাগ হ'বলৈও আহ্বান জনাই ৷ এই অনুষ্ঠানত মুখ্যমন্ত্ৰী সৰ্বানন্দ সোণোৱালক সংগ দিয়ে বিজ্ঞান আৰু তথ্য বিভাগৰ মন্ত্ৰী কেশৱ মহন্তই ৷ অনুষ্ঠানত নিজ ভাষণত ৰাজ্য চৰকাৰৰ বিজ্ঞান মন্ত্ৰীজনে আগন্তক দিনত ৰাজ্যত বিজ্ঞান শিক্ষাৰ প্ৰসাৰত বিশেষ গুৰুত্ব দিয়া হ'ব বুলিও উল্লেখ কৰে ৷