তেজপুৰ, 28 ডিচেম্বৰ :আজৰি সময়ত ছাত্ৰ-ছাত্ৰীকে ধৰি অধিকাংশ লোকেই ব্যস্ত থকা দেখা যায় টিভি, ম’বাইল ফোন আদিত ৷ নিজকে ব্যস্ত কৰি ৰাখে ইণ্টাৰনেটৰ বহল পৰিসৰৰ ভিতৰত ৷ গ্ৰন্থ অধ্যয়নৰ প্ৰতি যেন ধাউতি নোহোৱা হৈছে অধিকাংশৰে ৷
ভাৰ্চুৱেল পৃথিৱীখনত নিজকে নিমজ্জিত কৰি ৰখা দেখিবলৈ পোৱা যায় অধিকাংশ লোককে ৷ তাৰ মাজতে ব্যতিক্ৰমী প্ৰচেষ্টাৰে মানুহৰ মাজত কিতাপ পঢ়াৰ অভ্যাস গঢ় দিবলৈ আগবাঢ়ি আহিছে অৰুণাচল প্ৰদেশৰ এটা স্বেচ্ছাসেৱী সংগঠন নুৰাং লাৰ্নিং ইনষ্টিটিউট ৷
প্ৰতিষ্ঠানটোৱে নিৰ্জুলিত পদপথত ক্ষুদ্ৰ ক্ষুদ্ৰ পুথিভঁৰাল স্থাপনেৰে এক বিশেষ প্ৰচেষ্টাৰে গঢ়ি তুলিছে একাংশ 'ষ্ট্ৰীট লাইব্ৰেৰী' ৷ অনুষ্ঠানটোৰ সঞ্চালিকা নুৰাং মীনাৰ এনে পদক্ষেপক প্ৰশংসা কৰে স্থানীয় ৰাইজে ৷ জনসাধাৰণৰ মাজত কিতাপ পঢ়াৰ মাদকতা ঘূৰাই অনাৰ প্ৰচেষ্টাৰে নুৰাং মীনাই এনে পদক্ষেপ গ্ৰহণ কৰে ৷ ইতিমধ্যে প্ৰদেশ খনৰ কেবাটাও স্থানত গঢ় লৈ উঠিছে অনুৰূপ ষ্ট্ৰীট লাইব্ৰেৰী ৷